Servisio di Atmishon ta lansa trayekto di Integrashon Responsabel

Servisio di Atmishon ta lansa trayekto di Integrashon Responsabel

Geplaatst op 16 March 2021 dor di Ministerio Hustisia

WILLEMSTAD – Integrashon Responsabel ta un trayekto pa personanan ku promé ku 13 di mart 2020 a yega Kòrsou di forma legal, pero ku aktualmente ta permanesé di forma indokumentá riba nos isla. E grupo akí por risibí un pèrmit di estadia temporal. E persona ku ke apliká mester kumpli ku tur rekisito vigente, manera stipulá den lei i maneho.

Ministerio di Hustisia a hasi un análisis ekstenso na 2020, pa determiná di ki forma por atendé ku personanan indokumentá den nos komunidat. Motibunan humanitario a hunga un ròl importante. Ademas kontribushon di e personanan akí den kaha di Pais Kòrsou ta un faktor determinante. Esaki ta representá alabes un di e benefisionan prinsipal pa introdusí e maneho temporal akí.

Tin un lista di rekisito spesífiko basá riba e motibu pa kua e persona por apliká pa e pèrmit. Un di e rekisitonan ta ku e persona ku ta apliká mester a yega Kòrsou promé ku 13 di mart 2020 di forma legal. Tin rekisitonan general tambe ku ta konta pa tur hende. Esaki ta enserá: prueba di pago, pasport bálido, akta di nasementu di no mas ku dos aña bieu, antesedente penal di no mas bieu ku 13 di mart 2019 i deklarashon di garantia. Tur persona ku ta kalifiká por apliká riba http://www.immigrationcur.org. Riba e portal akí por haña un lista di tur rekisito nesesario. Por apliká solamente si ta kumpli ku tur e rekisitonan akí.

E proseso di aplikashon ta inisiá na momentu ku e persona ku ta apliká yena e formulario kompleto riba e portal, i agregá tur dokumento nesesario kompañá pa eventual formularionan adishonal inkluso e prueba di pago ku ta nesesario. Na momentu ku tur rekisito a pasa via e portal, Servisio di Atmishon ta registrá e aplikashon i manda e komprobante di registro di e petishon pa e persona ku a apliká. E proseso di análisis i desishon final ta dura un máksimo di 6 luna despues di e fecha di aplikashon. Por apliká for di 22 di mart te ku 22 di sèptèmber 2021 riba http://www.immigrationcur.org.

Pa mas informashon tokante e proseso di aplikashon i e rekisitonan por fabor bishitá http://www.immigrationcur.org. Tambe por bishitá página di FaceBook di Servisio di Atmishon (Toelatingsorganisatie Curaçao).

Ministerio konserní 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: