Koredó tambe ta haña lus LED inteligente LUSNAN LED INTELIGENTE INSTALA EKSITOSAMENTE PA UN I TUR EKSPERENSHA E LUSNAN DI KAYA DI FUTURO

Koredó tambe ta haña lus LED inteligente

LUSNAN LED INTELIGENTE INSTALA EKSITOSAMENTE PA UN I TUR EKSPERENSHA E LUSNAN DI KAYA DI FUTURO

Willemstad 22 di desèmber 2020. E instalashon di e lusnan LED inteligente riba Emancipatie Boulevard Dominico Don Martina (Nieuwe Haven), krusada Schottegatweg/Santa Rosaweg (altura di Zuikertuintje) i kaminda pa bai Banda Bou (altura di área di Zegu pa Groteberg) a konkluí eksitósamente. Esaki danki na koperashon di públiko i trabou diligente di e téknikonan.  Awor pueblo di Kòrsou tin, aparte di Julianadorp, Lagun i Domi Ariba, tres área mas kaminda por eksperenshá iluminashon di futuro riba nos kareteranan mediante lusnan LED.  Esaki ta forma parti di e pruebanan ku Aqualectra i Ministerio di Tráfiko, Transporte i Planifikashon Urbano ( VVRP) ta hasiendo pa den un futuro serkano apuntá e kompania pa suministrá e lusnan LED pa kubri tur karetera di Kòrsou ku e lusnan aki di futuro. A opta pa inkluí tambe Koredó na Rif komo un di e áreanan di prueba. E último aki lo no kontribuí solamente na e trayekto di modernisashon ku Gobièrnu a entamá den e área, pero tambe na krea e ambiente i visibilidat durante atardi i anochi kaminda un grupo grandi di nos komunidat ta hasi ehersisio pa tene e kurpa den kondishon.

En total a kambiá 505 armatura i pera plùs pone ekipo inteligente pa komuniká ku un punto sentral den Aqualectra riba e tres kareteranan aki e simannan ku ta tras di lomba. Aparte di ta lusnan LED, e lusnan aki lo por wòrdu manehá individualmetne i lo manda un alarma ora ku e no sende. Esaki ta hasi henter Kòrsou su infrastruktura di lus di kaya inteligente. Huntu ku e lusnan LED inteligente ku tin na Lagun, Domi i Juliana Dorp Kòrsou su kareteranan te ku awor ta iluminá ku en total 1.136 lus LED inteligente. 

Riba Koredó lo kambia 124 armatura i pera di lus. Banda di esaki lo bai añadí algun armatura mas na kaminda pa Banda Bou pa asina duna mas kobertura di lus riba e kaya.  Esaki spesialmente den e áreanan kaminda ta visibel ku tin falta lus. E lusnan riba Emancipatie Boulevard Dominico Don Martina (Nieuwe Haven) i Schottegatweg a keda bon, awor lo sigui ku e trabounan pa optimalisá e ret i ahustá e iluminashon na e nivel segun norma.

 

E instalashon di LED riba e tres kareteranan (Weg naar Westpunt, Nieuwe havenweg i Schottegatweg) aki huntu ku esnan di Lagun ta forma parti di un prueba di konsepto (Proof of Concept) pa remplasá lusnan di kaya rònt Kòrsou, bou di direkshon di e Departamento di Obra Públiko di Ministerio di Tráfiko, Transporte i Planifikashon i Aqualectra. 

Sra. Zita Jesus- Leito Minister enkargá ku Tráfiko, Transporte i Planfikashon Urbano a bisa “Di e forma aki nos ta kumpli ku nos promesa pa dal pasonan konkreto pa krea un tráfiko mas sigur i mobilisashon mas fásil riba nos kareteranan. Pueblo awor por kuminsá kustumbrá ku e lusnan di karetera no únikamente mas kla, pero tambe ku ta brinda mas funshonalidat ku ta garantisá seguridat na e lokalidatnan  i tambe mantenshon di nan. Ku Koredó inkluí den e proyekto di prueba, nos pueblo por probecha tambe aún mas di e área pa tene e kurpa den kondishon.  Huntu ku Aqualectra nos Ministerio lo sigui traha riba ekstendé e infrastruktura aki rònt Kòrsou.”

E prueba di konsepto lo terminá ku instalashon di e tres areanan aki i Koredó. Ta e intenshon pa kuminsá otro aña ku remplaso di lusnan di kaya rònt nos isla na momento ku aprobá e periodo di prueba ku ta andando.