Medidanan Preventivo kontra COVID-19.

Den kuadro di e ‘lockdown’ ku gobièrnu di Kòrsou ta bai introdusí mañan dia 24 di mart, De SGR-Groep a tuma algun medida preventivo èkstra pa protehá nos klientenan i tambe pa mantené nos mes na tur e reglanan ku gobièrnu a stipulá.

Entrante djárason 24 di mart 2021, lo no pèrmití niun persona subi terenonan di De SGR-Groep. Esaki ta inkluí ofisinanan di De SGR-Groep, departamentunan di Fundashon Verriet, Het Revalidatiecentrum Curaçao i tambe Curaçao Orthotics & Prosthetics. Esaki naturalmente ku eksepshon di empleadonan. Esaki ta nifiká ku lamentablemente famianan lo no por bishitá e habitantenan di Fundashon Verriet ni tampoko e pashèntnan di Revalidatiecentrum Curaçao den e dianan benidero.

Pa loke ta trata personanan ku tin un afsprak na Revalidatiecentrum Curaçao òf na Curaçao Orthotics & Prosthetics, tur afsprak ta wòrdu kanselá te ku un próksimo aviso. Durante di ‘lockdown’ lo atendé solamente kasonan di emergensia.

Un otro medida ku nos a tuma ta ku tur sentro di pasadia di Fundashon Verriet ta wòrdu será. Ku otro palabrá, tur aktividat ta para temporalmente i niun kliente no mag di bai nan sentro di pasadia. Esaki di moda ku nos klientenan tambe por bai den karentena na kas, sin e riesgo di por kontagiá riba kaya.

Nos tim di krísis lo sigui tur desaroyo tokante COVID-19 di aserka. Aki dos siman nos lo evaluá e medidanan aki i adaptá esakinan si ta nesesario, basá riba instrukshonnan di gobièrnu di Kòrsou.

De SGR-Groep ta supliká un i tur, pa porfabor sigui tene boso mes na tur e medidanan general di higiene i tambe e medidanan di prevenshon ku gobièrnu a stipulá pa asina nos por minimalisá e propagashon di COVID-19 den nos komunidat. Nos ta huntu den e lucha aki, pues laga nos tur ban kuida.