KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

GOBIERNUNOTISIA

Ponensianan eróneo relatá na Konseho Supremo Elektoral

 

Ponensianan eróneo relatá na Konseho Supremo Elektoral

 

Willemstad – Konsiderando e diferente ponensianan eróneo, partikularmente pa loke ta trata e deklarashonnan ku tabatin “stembiljet” pretu ku blanku den sirkulashon, Konseho Supremo Elektoral (KSE) ke aklará algun punto pa buena marcha di nos demokrasia. Pasobra no únikamente integridat di Konseho Supremo Elektoral, pero tambe resultado di elekshon último di e manera aki ta keda kuestioná.

 

Djabièrnè 19 di mart, 116.146 habitante di Kòrsou por a vota pa miembronan di Staten. Durante di e dia aki, Konseho Supremo Elektoral a duna relato di akontesimentunan na e diferente urnanan ku tabata di importansia. Konseho Supremo Elektoral a duna informashon alrededor di mitar di 1 di mèrdia, mitar di 5 di atardi i despues 8or di anochi. 

Durante e seshonnan di informashon aki, a duna na promé lugá indikashon di kantidat di hende ku na e momentu ei  a bai vota i manera indiká kaba, duna relato  di otro akontesimentu di e dia. Durante di dia, konstantemente Konseho Supremo Elektoral tabata den kontakto ku tur presidente di urna pa nan duna informashon di loke ta pasando. Durante  henter dia Konseho Supremo Elektoral no a risibí ningun indikashon ku tin “stembiljet” pretu ku blanku den sirkulashon. 

 

Manera un i tur ku a sigui e seshonnan di informashon sa, durante di e delaster seshon di informashon ku a kuminsá despues  ku tur urna a sera, un pregunta a yega serka Konseho Supremo Elektoral enkuanto “stembiljet”  pretu ku blanku ku un votadó a risibí na urna p’e vota riba dje. Na e momentu ku Konseho Supremo Elektoral a risibí e pregunta, Konseho Supremo Elektoral korektamente a kontestá kiko lei ta preskribí enkuanto votonan bálido i votonan inbálido. Un “stembiljet”  pretu ku blanku, no ta kai den kategoria di votonan bálido pasobra lei ta indiká ku e “stembiljet” tin koló. Despues di e splikashon aki, a lanta un konsternashon den komunidat riba e asuntu di “stembiljet”  pretu ku blanku i su balides. Ta bon pa enfatisá tambe, ku na e momentu ku e pregunta a yega Konseho Supremo Elektoral, ta promé biaha ku Konseho Supremo Elektoral a tende esei. 

 

Na final di konteo di voto djabièrnè 19 di mart, a presentá e resultado preliminar, den kual un kantidat di 1052 voto a keda kategorisá komo inbálido. E pregunta riba “stembiljet” pretu ku blanku a keda konstante i esaki a pone Konseho Supremo Elektoral tuma dianan 20 i 21 di mart pa investigá pa médio di kòntròl di prosèsverbal, e problemátika aki. 

Ademas Konseho Supremo Elektoral a tuma kontakto ku presidentenan di urna ku e pregunta si nan a mira un “stembiljet”  pretu ku blanku na momentu di konteo di voto. Kontesta riba e pregunta tabata nò. Konseho Supremo Elektoral a repasá tur prosèsverbal pa wak si tin un anotashon ku ta mustra riba un “stembiljet”  pretu ku blanku. For di e observadó di partidonan ku tabata na urna na momentu di konteo di voto tampoko Konseho Supremo Elektoral no a risibí indikashon ku a mira un “stembiljet”  pretu ku blanku.

Konseho Supremo Elektoral por a lesa den prosèsverbal di un urna (104) un anotashon kaminda votadó a bai bèk su urna alrededor di 8:45 di anochi pa indiká ku durante di dia el  a risibí un “stembiljet”  pretu ku blanku. Na momentu di konteo di voto, niun persona inkluso e observadó di e partido ku tabata presente, sinembargo no a mira ni un “stembiljet”  pretu ku blanku. 

 

Konseho Supremo Elektoral a sigui ku mas investigashon di prosèsverbal di e urnanan pa determiná presensia di “stembiljet”  pretu ku blanku, sin resultado positivo pa e votadó ku a indiká ku su voto a bai riba un “stembiljet” pretu ku blanku. A base di prosèsverbal di e 117 urnanan,  Konseho Supremo Elektoral por a konstatá  ku niun voto inbálido no a kai den e kategoria di un “stembiljet”  ku no ta e “stembiljet”  ofisial.

 

E votonan inbálido a resultá den e siguiente kategoria:

Motibu di votonan inbálido den 2021
Kantdat di “stembiljet”  ku no ta e “stembiljet”  ofisial 0
Kantidat di “stembiljet”  ku niun rònchi yená 267
Kantidat di “stembiljet”  ku mas ku un rònchi yená 401
Kantidat di “stembiljet”  den kua no a usa pòtlot kòrá 22
Kantidat di “stembiljet”  den kua tin remarke skibí 395
Kantidat di “stembiljet”  sin e firma di presidente di KSE 0
Total kantidat di votonan inbálido 1085

 

Lei ta preskribí ku 5 dia despues di elekshon, mester tin un reunion públiko pa determiná resultado di elekshon. Durante e  seshon aki kaminda tabatin votadónan presente, Konseho Supremo Elektoral a risibí diferente opheshon speshalmente enkuanto presensia di e “stembiljet”  pretu ku blanku. Durante e  seshon, esnan presente a pidi pa habri resultado di algun urna kaminda sierto votadó insistentemente a indiká ku tin “stembiljet”  pretu ku blanku. Pues e intenshon tabata pa averiguá si ta tin “stembiljet”  pretu ku blanku. 

Konseho Supremo Elektoral a habri diferente saku dilanti di e públiko presente, mustra tur “stembiljet”, repasá votonan bálido i inbálido i niun testigu no a mira ni un “stembiljet”  pretu ku blanku. 

 

Den e proseso aki tambe, Konseho Supremo Elektoral a indiká ku na su konosementu no tabatin niun indikashon ku tin “stembiljet”  pretu ku blanku den sirkulashon repartí dor di Konseho Supremo Elektoral den urna. Pues ku otro palabra, Konseho Supremo Elektoral no por bisa ku tabatin “stembiljet”  pretu ku blanku pasobra no a konstatá esei. Si akaso e “stembiljet” pretu ku blanku manera indiká dor di algun votadó tabata den konteo, e no a keda konsiderá komo voto inbálido. 

Basá riba e puntonan ariba menshoná i sifranan históriko enkuanto votonan inbálido, no tin niun motibu organisatorio ni hurídiko pa un rekonteo total i òf pa yama un elekshon nobo.

 

E proseso elektoral ku Konseho Supremo Elektoral ta organisá i supervisá ta basá riba mas ku 100 artíkulo di lei. Kada paso ta determiná i deskribí. Konseho Supremo Elektoral komo instituto no tin niun otro meta ku no ta pa organisá elekshon di forma liber i transparente pa skohe 21 representante ku ta bai forma Staten. Den nos elekshon liber, sekreto i transparente di dia 19 di mart último, nos komunidat a skohe su representantenan. Ta ta di gran desapunto pa algun miembro di nos komunidat tilda e instituto Konseho Supremo Elektoral i su miembronan sin niun base supstansiá. Pues, Konseho Supremo Elektoral ta rechasá e alegashonnan no fundá i sin prueba ku ta stroba e proseso finalisá. 

 

Resultado di elekshon ta konosí, dia 11 di mei tin 21 miembro di Parlamento ku mester sinta pa hasi nan trabou komo representante di nos pueblo. Konseho Supremo Elektoral tin ainda hopi trabou pa ehersé promé ku esei tuma lugá i akusashonnan infundá na miembronan di Konseho Supremo Elektoral pero tambe na tur e otro trahadornan di urna, no ta kontribuí ku nada. Sin embargo ku esaki Konseho Supremo Elektoral ta deklará ku e ta respetá tur e votadٕónan ku honestamente a haña e impreshon ku nan a vota riba un “stembiljet”  pretu ku blanku. 

Kòrsou mester perkurá pa no laga institutonan demokrátiko bai pèrdí; si un pilá esensial di nos demokrasia kai, nos por drenta un abismo sosial i konstitushonal grandi. Daño na integridat i konfiabilidat di e instituto ku ta responsabel pa elekshon, tambe ta nifiká daño na esnan skohí.

639114718427035"
639114718427035"