Meteorological Department Curacao Esaki ta un splikashon pakiko e shinishi di volkan na Saint Vincent ta move bai den direkshon ost en bes di direkshon wèst.
Esaki ta un splikashon pakiko e shinishi di volkan na Saint Vincent ta move bai den direkshon ost en bes di direkshon wèst.
Ta un kustumber ku kasi hinter aña bientu den Área di Karibe ta supla for di direkshon ost. Esei ke men ku e aire na suela i na nivelnan mas abou ta move di ost bai wèst. Esei ta e kaso tambe na e nivelnan un tiki mas haltu te mas o ménos un altura di 2 pa 3 kilometer (por mira esaki riba e promé plachi).
Mas haltu bo yega, 7-12 kilometer, mas grandi e posibilidat ta ku bientu lo supla for di un direkshon entre di sùitwèst i nortwèst. Laga nos usa un direkshon di bientu promedio for di wèst, ke men den e kasonan aki e aire ta move di wèst bai ost (di dos plachi).
Den e kaso di e volkan aki, e nubia di shinishi volkániko kayente ta sali ku hopi forsa for di e krater i ta lanta bai te masha haltu. E gran kantidat di e shinishi lo yega altura di 6 pa 12 kilometer i hasta mas ku esei na sierto momentu.
Un parti di e nubia di shinishi na nivel abou 1-3 km ta move den direkshon wèst. Mayoria di e shinishi ta kai bèk na suela riba partinan di Saint Vincent mes òf riba laman djis ei banda.
Un parti signifikante di e shinishi sin embargo lo sigui subi te na nivelnan entre di 7-12 kilometer. Na e nivelnan ei e bientunan ta supla basta fuerte te duru for di direkshon wèst i konsekuentemente e shinishi ta hala bai ost na e alturanan ei.
Ta p’esei riba animashon di imágennan di satelit nos ta mira e shinishi i tambe e nubianan na nivel haltu ta move di man robes bai man drechi.
