Konosido Fifi Rademaker den kombersashon ku Minister Croes na su weekend- huis na Westpunt. 

Konosido Fifi Rademaker den kombersashon ku Minister Croes na su weekend- huis na Westpunt. 

 

Willemstad- Djasabra 11 di aprel último, Minister di Enseñansa, Siensia, Kultura i Deporte (ESKD) demisionario, Steven Croes, a hasi un bishita serka un otro baluarte, esta Philip (Fifi) Rademaker, un artista hopi bon konosí i altamente apresiá den komunidat di Kòrsou.

 

Manera kustumber Minister demisionario di Enseñansa, Siensia, Kultura i Deporte (ESKD, Steven Croes, ta dediká parti di su wikènt pa bishitá i kombersá ku baluartenan, dunando asina  rekonosementu na personanan ku di un òf otro manera ta kontribui grandemente na nos historia i kultura. Den un ambiente relahá na Westpunt, Fifi a konta kon ela lanta na Otrabanda i tabata bai Banda Bou wikènt ku su mayor i rumannan. Kasi 30 aña pasá ela kumpra e ‘weekend-huis’ ku  e ta biba aktualmente aden, un lugá ku e mes poko poko a drecha. Durante tempu hopi famia tabata pasa semana santa serka dje i tripulantenan di barkunan tabata organisá fiesta na su weekend-huis..

Fifi a hasi masha hopi mes den su bida pero aworaki e ta disfrutá di su trankilidat aya na Wespunt. E ta poeta, aktor,  artista, direktor di esena i pintor. Pero tòg e mes no ta konsiderá su mes un baluarte. Pe ta konta e satisfakshon di loke e por a hasi durante su bida pa su mes i pa su komunidat. Fifi a konta Minisiter Croes tokante diferente fase di su bida. Na hòben e tabata aktivo den polítika na skol. E tabata por pinta bon i asina tabata yuda Partido Radikal ku nan korant. Ela asta hañé den problema i keda hinter un anochi den warda di polis pa motibu di esaki. Pero ela sigui pinta paso nan tabata pagé bon i na kas nan tabatin mester di e sèn. Fifi tabata yuda diferente partido politiko i tabata hopi serka di lantamentu di partido MAN. Pero nunka ela bira miembro di un partido polítiko pasobra e tabata ke pinta pa nan tur. Ounke e tin diploma komo maestro di skol, nunka ela para dilanti klas duna lès. Ela skohe pa bai traha na banko i gobièrnu pero ku tempu su espiritu kreativo a pone skohe pa un profeshon den sektor kreativo. Fifi ta músiko tambe. Ela toka den e banda Feco’s Combo huntu Erol el Toro Coluna, Efrain Cums i hopi mas. E tabata un fanátiko di karnaval. Ela konta kon un bia nan a traha un karosa di un makaku masha grandi mes, ku pa un deskuido chikí, dos dia promé ku marcha grandi, a pega na kandela. Di tur banda hende a bin yuda i asta un persona a bula bai Venezuela ku su avion privá pa kumpra e material pa dòrna e makaku bèk i marcha grandi e karosa a lusi den karnanal manera nada no a pasa. Mustrando alabes kon bon nos por koperá i yuda otro na momentu ku tin mester. 

Asina Fifi a sigui konta tokante momentunan importante den su bida i tambe susesonan prèt ku ela pasa aden, meskos ku e beter ku e gusta dal. Semper ela sigui desaroyá su mes. E ta usa Facebook regularmente i ta konsiderá esaki un medio kaminda bo por siña konosé hende, siña konosé i apresiá diferensia den pensamentu di hende i alabes skucha kiko ta biba den komunidat. Fifi a mustra riba importansia di lesamentu pa un persona por forma su mes. E mes a skibi tres buki, di kual 2 buki di poesia i un buki di kuenta kòrtiku. Philip (Fifi) Rademaker ta un baluarte grandi di Kòrsou ku mientrastantu a tuma su bakuna kompleto i ta stimulá tur hende pa hasi esei mas lihé posibel. Tabata un mainta masha plasentero i Minister Croes di kurason a apresiá e hospitalidat i forma habrí ku Fifi a konté tokante su bida.

This site uses Akismet to reduce spam. Learn how your comment data is processed.

error: Content is protected !!
%d bloggers like this: