KOMUNIKADO KUERPO POLISIAL KÒRSOU Polis no ta tumando telefòn di siudadano na kontrol pa wak nan asuntunan privá.

KOMUNIKADO DI PRENSA 148 / 2021
19 aprel 2021
Polis no ta tumando telefòn di siudadano na kontrol pa wak nan asuntunan privá.
Departamentu di Komunikashon i Prevenshon

KUERPO POLISIAL KÒRSOU SIRBI I PROTEHÁ
Den fin di siman polis a tuma nota ku algun persona via di medionan sosial, a indiká ku
durante di kontrolnan den kuadro di medidanan di Covid-19, polis lo ta tuma telefòn di
siudadanonan i wak nan asuntunan privá. Manera p.e. ku nan ta den appgroup ku ta mèldu
unda polis ta teniendo kontrol.
Inmediatamente polis a tuma kontakto ku un di e personanan ku a duna di konosé ku el a
bira víktima di e situashon aki, pero na su turno a desmentí kompletamente.
Kuerpo Polisial ta lamentá ku si di bèrdat tin siudadanonan ku a pasa den e eksperensia aki,
ta skohe pa pone e situashon aki riba medionan sosial ku kua sea ta e interes, en bes di
kana e kamindanan legal i ofisial pa eventualmente investigá e kasonan aki.
E kuerpo mes, pro aktivamente a hasi su investigashon i a sali na kla ku ningun momentu
tabatin asuntu di tuma telefòn di siudadanonan pa wak nan asuntunan privá.
E intenshon maligno fabriká aki no ta hasi ningun bon na e imágen di polis.
Ta bon si pa indiká, ku tin siudadano mes ku ta laga polis wak tantu nan pólisa di seguro
digital komo nan sita pa bakuná den nan telefòn.
Ku tur probabilidat, esaki ta e konfushon òf informashon konsientemente robes ku ke krea
den komunidat i pa kita e ‘focus’ for di e kontrolnan ku polis ta ehersé.
E úniko propósito di Kuerpo Polisial pa ku e kontrolnan aki ta, pa yuda redusí infekshon i
asina baha e kantidat di siudadanonan ku ta bira malu i fayesé debí na Covid-19.
Di tur manera e kontrolnan aki lo kontinuá den dianan ku ta bini manera ya kaba tabata e
kaso.