Sostennan empresarial ta brindando ketu bai perspektiva na diferente empresa i empresario lokal

Sostennan empresarial ta brindando ketu bai perspektiva na diferente empresa i empresario lokal

Geplaatst op 04 May 2021 dor di Ministerio Desaroyo Ekonómiko

WILLEMSTAD – Den un konferensha di prensa djaluna, dia 3 di mei, Minister demishonario di Desaroyo Ekonómiko (MEO), sr. Steven Martina a duna un bista breve di Fondonan di Sosten Empresarial ku ta kai bou di Ministerio di Desaroyo Ekonómiko (MEO) i e impakto di esakinan te awor.  MEO ta enkargá ku ehekushon di diferente sosten finansiero pa empresa i empresario individual ku a keda afektá dor di e situashon di COVID-19. For di apertura di e portal riba 18 aprel 2020 te ku awor, un total di 179.4 mion florin a bai den nos ekonomia via di e diferente sostennan empresarial.

Entre aprel 2020 te ku aprel 2021, MEO a bin ta ofresé entre otro un sosten pa supsidio di salario (NOW), sosten na empresarionan individual (TBZO), supsidio pa por kubri gastunan operashonal fiho di e empresanan (TVL), pero tambe a bin ta ofresé un programa di training i coaching pa medio di MiNEGOSHI i konhuntamente ku Qredits i Korpodeko a duna e posibilidat pa empresanan por a hasi petishon pa un fasilidat di krédito transitorio. Aworakí tin plania pa pronto kuminsá tambe ku un programa di (re)kapasitashon di desempleadonan, empleadonan ku ta risibí salario pa medio di supsidio di NOW i personanan ku ke òf a kaba di lanta nan propio negoshi.

Di aprel 2020 te ku awor MEO a finansiá un total di 116.7 mion na supsidio pa salario mihó konosí komo NOW lokual a sòru pa un promedio di 7.744 trahadó pa luna por a risibí un salario i mantené nan kupo di trabou. E sektornan mas afektá ku te ainda ta apliká mas tantu pa NOW ta: sektor turístiko (26%), benta general (23%), benta por detal no pa konsumo (17.6%) sigui pa sektor di konstrukshon (4,5%) i entretenimentu (3.7%). Na empresarionan individual (TBZO), MEO a finansiá kasi 30 mion florin di aprel 2020 te ku awor. Esaki ta representá un kantidat promedio di 1.600 empresario individual. Pa loke ta trata e supsidio pa gastunan operashonal fiho (TVL), un total di kasi 31.4 mion a keda finansiá  na 704 kompania pa e dos kuartalnan di 2020. Pago pa kuartal 1 di 2021 lo bai kuminsá tuma lugá e siman aki. Huntu ku Qredits i Korpodeko, MEO a bin ta ofresé tambe un fasilidat di krédito te ku un máksimo di 25.000 florin na empresanan. Te ku awor, 77 empresa a logra haña finansiamentu pa un montante total di 1.6 mion florin.Den e aña tras di lomba, MINEGOSHI a asistí 387 empresa ku un total di 433 trayekto. Pa luna di mei akí tantu e supsidio pa salario (NOW) komo tambe e sosten na empresario individual (TBZO),  ta sigurá i ta e intenshon pa e periodo pa ámbos bolbe habri den e siman di 24 di mei próksimo. MEO ta enfatisá, ku ta hopi importante pa semper e aplikashon pa tur e sostennan ta yená kompletu i tambe pa nan keda hasí den e periodo stipulá.

Empresarionan ku tin mester di informashon adishonal tokante un di e sostennan disponibel, por tuma nota di e splikashon riba wèpsait di Fondo di Sosten (www.fondodisosten.org) promé ku nan apliká. Pa kualke pregunta i/òf otro informashon por aserká tambe e diferente helpdesknan pa medio di e-mail adrès: now@fondodisosten.orgtvl@fondodisosten.orgempresario@fondodisosten.orgkredito@fondodisosten.org,òf via WhatsApp 516-2415.

Atministrashon di NOW durante e aña tras di lomba, a bai di forma korekto. Esaki a keda konfirmá i publiká den karta di Cft nr. 202100024 di dia 10 di mart 2021 kaminda nan ta informá Gobièrnu di Kòrsou ku konklushon di e rapòrt di BDO ta indiká ku Kòrsou a risibí un goedkeurende verklaring. Esaki ta enserá, ku fondonan risibí den kuadro di NOW a keda atministrá, ehekutá i raportá na un manera korekto.

Di akuerdo ku reportahe di IMF i CBCS, e situashon ekonómiko kousá dor di e pandemia akí ta hopi fèrfelu, pero danki na e posibilidat di por a brinda sostennan finansiero por a logra mitigá un parti di e resultadonan aún mas drástiko ku esaki por tabatin riba nos pais.

 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: