Kòrsou Salú ta presentá Konferensia “Bo tripa i gluten: enemigu silensioso?”

 

Willemstad, 17 di mei 2021 

Kòrsou Salú ta presentá Konferensia “Bo tripa i gluten: enemigu silensioso?”

Den kuadro di Dia Mundial di Salú Digestivo, 29 di mei próksimo,  Kòrsou Salú ta lansa su promé konferensia “Bo tripa i gluten: enemigu silensioso?”. E meta di e konferensia ta pa duna informashon pa promové nos salú i evitá malesa i asina stimulá nos tur pa hiba un bida mas salú. Kòrsou Salú ta un movementu pa konsientisashon riba aspektonan ku ta influenshá nos salú i bienestar. Aplikando siensia, medisina integral i énfasis riba prevenshon nos lo logra un pueblo konsiente, salú, i felís. 

 

Konferensia “Bo tripa i gluten: enemigu silensioso?”

E Konferensia lo tuma luga djasabra 29 di mei 2021 di 7 or pa 10 or di anochi i lo kontinuá djadumingu 30 di mei 2021 di 11.00 or di mainta pa 1 or di merdia. Den e konferensia lo splika mas amplio i mas komprendibel e motibu di kon un kurpa por reakshoná malu ora kome gluten, pues indiká mas presis e reakshon auto-imunológiko pa por komprendé e síntomanan. Por registrá i sigui e Konferensia via Facebookpage: Kòrsou Salú. E Konferensia ta e inisio di konsientisashon riba e alergia di gluten. Despues lo sigui ku informashon riba mas tópiko di nos salú. 

 

E grupo ku ta lansa Kòrsou Salú ta konsistí di:

Vanessa Toré, persona ku e alergia

Rob de Lannoy, internista

Rudolf de Wit, eksperto den medisina alternativo

Gersham Henriquez, dokter di kas

Mercée Doran, edukador i presentador di programa

Tatiana Felix, persona ku e alergia

Kyona Daal, profeshonal den siensia di salú

Joanne Krips, persona ku e alergia

Carl Camelia, maestro di Meditashon Trasendental

Suzy Römer, eks minister di salú

I nos ta spera pa siguí krese ku organonan di konsulta i akshon.

 

Intoleransia, sensibilidat i alergia    

 

Tin 3 motibu ku sierto produkto ku un persona ta kome ta bai bon. Na promé lugá intoleransia pa e produkto. E persona ta produsí antikuerpo kontra di e produkto ku ta kousa inflamashon den e tripa ku tur su konsekuensianan. Esaki ta e kaso ora bo tin “Celiac Disease”. Na di dos lugá sensibilidat pa e produkto. Na di tres luga e hende por tin alergia pa e produkto. Por ehèmpel ora un persona haña un atake di astma despues di kome pinda, of ora e haña grawatamentu rònt kurpa despues di kome kabaron. Relashoná na gluten un hende por tin intoleransia pa gluten (Celiac) of e por tin sensibilidat pa gluten. (Non-Celiac Gluten Sensitivity). Tur dos ta a base di bo sistema imunológiko.

 

Gluten ta un proteina den sierto tipo di sereal manera trigo (‘tarwe’), sebada (‘rogge/gerst’), i spèlt. Ta bon pa bisa ku tin sereal ku no tin gluten, manera funchi, maishi chikí, amaranth. Tòg mester paga tinu ya ku e sereal ku e persona ku intoleransia of sensibilidat pa gluten por kome por ta kontagiá pa sereal ku si tin gluten ora nan ta plantá den serkania di otro.

 

Enemigu silensioso?

E hende ku tin intoleransia of sensibilidat pa gluten, por tin hopi keho ku ta parse di no tin nada di haber ku alergia. Resultado di variashon den e kehonan ta ku e pashènt por kana kaminda di dòkter pa hopi aña sin ku e alergia ta keda diagnostiká. 

 

Nos forma di komé i su influensia riba salú según investigashon

Hopi keho por keda eliminá evitando di komé produkto ku tin gluten. P’esei mester sa kuá produkto tin gluten òf laga i e persona mester por disponé di e produktonan sin gluten na un preis pagabel. Na Kòrsou nos no ta para ketu na e influensia di alimentashon riba nos salú. Den publikashonnan di Volksgezondheid Instituut Curaçao (VIC) por lesa ku dos tersera parti di nos poblashón tin sobrepeso i ku kasi un tersera parti ta obeso. Hopi hende ta sufri di diabetes, preshon haltu i  kolesterol haltu, siendo ku ta malesanan ku pa gran parti ta mará na nos forma di kome. Nos mester bira konsiente ku un gran parti di nos poblashon ta kome hopi “fast food” i  ta bebe hopi limonada tur dia.  Na mes momentu e resultado di e investigashon di VIC ta mustra ku nos no ta kome e kantidat di fruta i berdura deseabel. Nos mester konkluí ku nos manera di kome no ta salú.  Pa e hende ku intoleransia òf sensibilidat pa gluten nos sistema di kome ta hasi daño na su persona pasobra su kurpa mes ta resistí e sereal (pan, hariña) i ataká su resistensia i pone su kurpa, mente i selebre bai atras. 

 

Gluten i e konekshon entre tripa i kurpa

E hende por sufrí di diarea króniko, opstipashon, sushi pegahoso i ku mal holo, barika hinchá, falta di apetit, arohamentu, perdida di peso, kansansio, sanger abou i pèrdida di kalki den wesu i infertalidat. Serka mucha nos por mira estorbo den kresementu i retraso den pubertat. 

 

Gluten i e konekshon entre tripa i mente

E hende por sufri di depresividat i kambio di beis. Serka mucha nos por mira gana di yora.

 

Gluten i e konekshon entre tripa i selebre

Tripa i selebre ta konektá fisikamente dor di miones di nervio. Nos tripanan i su bakterianan ta kontrolá entre otro inflamashon i ta produsí hopi komponente diferente ku por afektá salú i e salú di e selebre.