Iglesia House of Worship, Proskuneo i HoW Radio 90.9 Fm ta selebrá e grasia di Dios!

Iglesia House of Worship, Proskuneo i HoW Radio 90.9 Fm ta selebrá e grasia di Dios!

 

Willemstad- Awe 24 di mei 2021, Iglesia House of Worship i e tim di Alabansa Proskuneo ta selebrá 23 aña di eksistensia miéntras HoW Radio ta selebrá 1 aña riba e frekuensia 90.9 fm. Tur esaki pa medio di e grasia di Dios. 

 

Tabata riba un djawebs 9 di aprel 1998 ku Pastornan Raimy i Arlette Juliet a risibí un palabra serka Dios den 1 Timoteo 4:11-16. Despues di a risibí konfirmashon di Pastornan Alex i Jasmin Senchi i Jan Zijlstra, 12 di april tabatin e promé orashon den nan studio di grabashon. Despues di esaki tur kos a kuminsá. E vishon i e direkshon a keda duná dor di Spiritu Santu i awe nos ta selebrá e GRASIA DI DIOS! 

 

For di e vishon aki a nase Proskuneo tambe ku ta e tim di Alabansa di Iglesia House of Worship. Proskuneo a mantené 23 aña di konsistensia tresiendo músika di alabansa i adorashon. Tambe poniendo alrededor di 30 produkshon den forma di disko kompakto i “videoclip”, riba merkado tur ku e meta pa halsa Kristu-Hesus i tambe kompartí e mensahe di e Palabra di Dios i speransa ku henter e pueblo di Kòrsou, Aruba, Boneiru, Hulanda i rònt mundu.   

 

HoW Radio tambe a keda agregá na e famia di Iglesia House of Worship. Awe ta hasi 1 aña ku HoW Radio a risibí e frekuensia di 90.9 fm. Despues di operá sigur 6 aña konsistentemente ku hopi amor i dedikashon komo un radio digital, HoW Radio a desaroyá den un radio ku su propio frekuensia, tresiendo programashonnan variá ku ta eduká, informá i enkurashá tur su oyentenan. 

Nos ta gradisido na henter e kongregashon di Iglesia House of Worship, oyentenan, sostenedónan di e vishon i henter e pueblo di Kòrsou, Aruba, Boneiru i Hulanda pa e amor i sosten demostrá na nos kongregashon. Nos lo sigui traha huntu pa kompartí e Palabra di Dios,  halsando nos Rei i Salbador Kristu-Hesus, ekipando i edifikando e pueblo di Dios i desaroyando bida di e adoradó. 

SEÑOR a hasi kosnan grandi pa nos, p’esei nos ta kontentu. (Salmo 126:3)

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: