Aliansa ta pidi investigashon riba kaso resien di intento di asesinato kontra di un dama víktima

 

ALIANSA TA PREOKUPA

 

Aliansa ta pidi investigashon riba kaso resien di intento di asesinato kontra di un dama víktima

 

Aliansa ta asombrá  di kuantu fayo a tuma lugá den e kaso  di  un víktima  di violen-sha doméstiko ku konsekuensia ku e señora i hasta mas hende por a pèrdè  nan bida siman pasá. Nos tin un Plan Nashonal ku ta un instrumentu pa kombatí violensha doméstiko ku no a keda apliká. Sinembargo ku hopi empeño e Plan Nashonal tabata parti di kampaña polítiko den e delaster elekshon. 

 

Aliansa tin un kandidat di pregunta na tur e servisionan, inkluso OM, ku a laga e víktima na kaya.  Aliansa ta spera ku OM i tur e servisionan ku a persiguí e mama víktima por saka lès di loke a sosodé. Aliansa ta pidi sinembargo un investigashon profundo di e kaso aki.

 

  1. E mama aki a hasi 5 denunsia di maltrato kontra e defuntu, sinembargo no a investigá su kaso. Loke si a sosodé ta ku e mama víktima mester a koperá ku e  ‘derechi’ di e tata pa wak e yu. E servisionan aki, inkluso OM,  a evaluá  e “derechi” di un agresor ku tabata un hende hopi violento mas importante ku e derechi di bida di e víktima. E derechi di e tata pa por wak e yu tabata mas importante mes ku e yu su derechi pa por biba na pas sin violensha rònt di dje.  E servisionan aki sa kiko ta  e konsekuensianan pa yunan ku weta agreshon pisá nan dilanti? Servisionan i O.M  a laga un sikólogo  papia ku e yu promé ku a tuma e desishonnan drástiko aki?

 

  1. E defuntu a mishi seksualmente ku e yu mas grandi di e mama ku no ta su yu. Ta saka e señora for di Kòrsou, sin regla ku e por divorsiá i haña kustodia di e yu. Nos sa ku esei kemen ku e tata lo usa esaki pa e por haña kontakto bèk ku e mama. Dicho hecho. OM i tur e servisionan sa ku na Santo Domingo e defuntu a haña e señora bèk i a purba di mat’é? Gobièrnu di Santo Domingo a ser’é un anochi i despues dun’é prohibishon di kontakto. E mester a sali for di e pais mesora. OM i tur e servisionan ku a yuda e tata, inkluso Voogdijraad/slachtoffershulp tabata disponé di e informashonnan aki? Si e kontesta ta sí kiko tabata e motibu pa duna e defuntu tantu preferensha akosto di e mama? Pueblo por haña un kontesta?

 

  1. A detené e mama 4 biaha di kua un biaha basá riba testimonio falsu pasó e no ta koperá pa e tata por wak i bai kas ku su yu. A kita e yu for di e mama henter un luna kaminda mama pa medio di su abogado mester a bringa pa por haña su yu bèk. Kiko tabata e motibu pa demonstrá tantu poder asina den e kaso aki, kompará ku e hecho ku tin tantísimo kaso di mucha ku te ainda no a keda tratá? Nos por haña un kontesta?

 

  1. OM a laga hasi un investigashon sikológiko i sikiátriko di e tata ku a drenta sali prizòn diferente biaha, inkluso den pasado a purba mata un señora ku tabata su pareha ku tiru den kabes? Na un banda OM ta bisa ku ta traha pa víktima, pero ta disidí pa obligá mama pa koperá pa e yu por bai kas di tata?

 

  1. Kon e servisionan aki, inkluso OM ta rima e hecho ku e mener defuntu tin prohibishon di kontakto pero alabes ta krea posibilidat pa tata por tin kontakto na kas ku su yu? No ta asina ku kada bes ku e trese e yu e mester di kontakto ku e mama; es mas no ta asina ku e por tin kontakto ku mama mas biaha pa ‘motibu’ di e yu?

 

  1. Ta kiko ta e maneho di OM den kolaborashon ku departamentu di polis? Pa kolmo ta bisa mama ku e tata por wak e yu na Rio Canario pa despues e yu mes bisa mama ku tata a bai kas kuné. Nos por konkluí  ku por regla kos a base di mentira? Nos ke sa. Aliansa a ripará tambe ku tur e servisionan ku a kometé e erornan aki ta kai bou di Minister di Hustisia.

 

E sistema ku a trata e kaso aki un biaha mas ta pone dede riba e defisiensia di organisashonnan ku mester para na vanguardia di yudansa di víktimanan. Aliansa sa di mas kaso den e delaster tempu aki kaminda e derechi di e víktima mester keda supordiná na e derechi di e agresor. Pa kolmo OM a bisa ku yudansa na víktima di violensha doméstiko tin prioridat. Si ta asina ta duna prioridat, nos tin un problema sumamente grandi aki na Kòrsou. Un biaha mas Aliansa ta pidi un investigashon profundo.

 

  1. Henriquez

Voorzitter Fundashon Aliansa

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: