Konseho di Minister ta risibí famoso hóben futbolista profeshonal Josua Brenet

 

Konseho di Minister ta risibí famoso hóben futbolista profeshonal Josua Brenet

 

WILLEMSTAD – Djárason 9 di yüni último Josua Brenet, e konosido futbolista profeshonal, a hasi un bishita di kortesia na Konseho di Minister riba invitashon di Minister demisionario di Enseñansa, Siensia, Kultura i Deporte (ESKD), Steven Croes.  

 

Josua Brenet tabata di bishita na Kòrsou, den kuadro di e wega di futbòl entre Kòrsou i Guatemala djamars 8 di yüni último pa e disfrutá aki di e wega i risibí e pèrmitnan pa konstrukshon di gobièrnu pa e kuminsá realisá un otro di su soñonan, esta un kompleho deportivo na Sabana Cras.

Josua Brenet a nase na Kerkrade na Hulanda. Su mayornan ta yu di Kòrsou i for di chikí e tabata bishita Kòrsou. Durante tempu su amor pa e isla a krese i su interes pa sostené desaroyo di deporte na Kòrsou, prinsipalmente bou di hubentut. Pa hasi esaki ela lanta un fundashon pa duna hóbennan entre 4 pa 25 aña oportunidat pa praktiká deporte  i desaroyá na talento. E mes a kuminsá su karera riba tereno di futbòl for di chikí, promé na SV Heerlen i despues na entre otro Roda JC. Na 2006 te 2008 e tabata hunga futbòl pa FC Omniworld, despues ASC Waterwijk i AVV Zeeburgia. For di 2012 te ku 2018 e tabata den PSV i for di 2018 te awor e ta un hunga pa Hoffenheim, un tim di futbòl profeshonal di Alemania. For di 2016 e ta forma parti di e Selekshon Nashonal di Hulanda.

Minister demisionario di Enseñansa, Siensia, Kultura i Deporte (ESKD), Steven Croes a keda hopi kontentu ku Josua Brenet a aseptá su invitashon i asina Konseho di Minister kompleto por a yam’e danki pa tur lokual e ta hasi pa Kòrsou. Manera ela bisa semper den kuadro di su vishon ‘Teach Them Young’, nos mester siña mucha fo’i chikí kon importante ta pa move sufisientemente di forma variá i siña nan kon importante ta pa partisipá aktivamente den deporte i desaroyá nan talento. Josua Brenet ta un gran ehèmpel di esaki. Kòrsou kompleto ta yam’e danki pa ta un modelo ehemplar pa nos hubentut.