Ministerio di Desaroyo Sosial, Labor i Bienestar ta bai introdusí un sistema di karchi di banko pa remplasá karchi sosial

Ministerio di Desaroyo Sosial, Labor i Bienestar ta bai introdusí un sistema di karchi di banko pa remplasá karchi sosial

Geplaatst op 17 June 2021 dor di Ministerio Desaroyo Sosial, Labor i Bienestar

WILLEMSTAD – Minister di Ministerio di Desaroyo Sosial, Labor i Bienestar sra.Larmonie- Cecilia ta para pa igualdat, dignidat i oportunidat, kaminda komunidat di Kòrsou ta na promé lugá. Sra.Larmonie –Cecilia ta di opinion ku kada usuario di ántes karchi sosial tin derecho di por hasi uso di su karchi di banko den kualke supermerkado, sin ku su bisiña mester sa ku e ta dependé di e sosten di Gobièrnu pa por alimentá su mes i/òf su famia.

Sra. Larmonie–Cecilia a tuma nota di e karta di e konsehero hurídiko di Suvecu den kual a notifiká Gobièrnu ku entrante djasabra 19 di yüni próksimo, e miembronan di Suvecu lo stòp di aseptá e karchi sosial di Ministerio di Desaroyo Sosial, Labor i Bienestar pa kompra den nan supermerkadonan. Suveco a informá Ministerio di Desaroyo Sosial, Labor i Bienestar ku nan ke traspasá na un sistema nobo di karchi kaminda nan ta risibí nan plaka mesora, sin tin ku manda faktura aden pa aprobashon pa risibí nan pago.

Mirando e posibilidatnan huntu ku Gobièrnu su banko di kas, Ministerio di Desaroyo Sosial, Labor i Bienestar lo introdusí un sistema di karchi di banko pa remplasá e sistema di karchi sosial ku ta aplikabel na e momento akí. E sistema di karchi di banko ta den preparashon i lo keda introdusí pronto na luna di yüli. Sra.Larmonie- Cecilia ta di opinion ku e sistema nobo di karchi di banko akí ta solushoná tur e opheshonnan ku Suvecu tin kontra e sistema aktual. Por konkluí ku tantu Suvecu komo Gobièrnu por ta satisfecho ku e solushon akí.

Sra. Larmonie-Cecilia ke ekstendé su gratitut na Suvecu pa e sosten ku nan a brinda na Gobièrnu durante e lunanan tras di lomba i ke enfatisá ku usuario mester por hasi uso di nan karchi di un forma anónimo i na tur supermerkado rònt Kòrsou.

Pa e motibu akí, kobradónan di ònderstant lo risibí nan rekargo djabièrnè 25 di yüni riba nan kuenta di banko. Buskadó di trabou huntu ku èks usuarionan di karchi di Krus Kòrá ku a registrá na Ministerio di Desaroyo Sosial, Labor i Bienestar, lo risibí nan rekargo djaluna 5 di yüli.

Den transkurso di e dianan akí Ministerio di Desaroyo Sosial, Labor i Bienestar lo duna mas informashon pa konsientisá usuarionan kon pa manehá nan presupuesto.

Sra.Larmonie-Cecilia ke notifiká tur usuario di karchi sosial pa kompra di kombustibel, ku por hasi uso di e saldo disponibel te ku djabièrnè 18 di yüni próksimo.

This site uses Akismet to reduce spam. Learn how your comment data is processed.

error: Content is protected !!
%d bloggers like this: