Gobièrnu di Kòrsou ta introdusí sédula nobo ku nos propio identidat
Gobièrnu di Kòrsou ta introdusí sédula nobo ku nos propio identidat
Geplaatst op 26 July 2021 dor di Ministerio Maneho di Gobernashon, Planifikashon i Servisio Públiko
WILLEMSTAD – Minister enkargá ku maneho di Gobernashon, Planifikashon i Servisio Públiko a risibí e promé ehemplar di e sédula nobo. E sédula nobo, despues di 11 aña ku Kòrsou a bira un pais outónomo den Reino, awor lo karga e nòmber di nos pais i su eskudo. Ademas e sédula nobo ta poseé e asina yamá “Machine Readable Zone” ku ta un banchi ku informashon kodifiká riba e tarheta for di kua elektrónikamente por lesa e informashon di e portadó. Dor di esaki, den futuro serkano, ta bira posibel pa biaha pa e islanan di èks Antias Ulandes usando e sédula. Miéntrastantu Departamentu di Asuntunan Públiko ta enkurashá siudadanonan pa sigui usa nan sédula aktual. Personanan ku mester apliká pa un sédula nobo òf di kua nan sédula a kaduká, lo risibí e vershon nobo di e sédula.
Minister Martina, durante su diskurso na e entrega di e promé ehemplar di e sédula, a bisa: “Awe, 11 aña despues ku nos a bira Pais Independiente den Reino, Kòrsou ta introdusí su sédula ku nos propio identifikashon. Aparte di e aspekto emoshonal importante akí, e sédula nobo tin benefisio práktiko na momentu ku nos biaha pa nos islanan ruman di èks Antias Ulandes.”
Un historial breve di nos sédula
Na aña 1965 a introdusí un tarheta di identidat pa siudadanonan di Antias Ulandes. Riba 23 di Mei 2002 a introdusí e sédula ku tamaño di un tarheta di krédito. Na mes momentu a ahustá e periodo di balides pa 5 aña en bes di 10 aña. Ademas, promé ku e tempu ei, e siudadano mester a bini ku su mes pasfoto na momentu ku mester a laga traha su sédula. Ora a introdusí e sédula nobo, e parti ei a keda adaptá. Kranshi mes a kuminsá saka e pòrtrèt.
Riba 26 di yüli 2021 a bolbe dal un paso importante pa loke ta trata desaroyo di nos tarheta di identifikashon. E tarheta ta karga nòmber i identifikashon di Kòrsou. E sédula ta kontené e film holográfiko, meskos ku ta e kaso pa e tarheta di reibeweis aktual. Un adelanto mas ta e informashon patras di e karchi (e asina yamá MRZ). Esaki ta brinda e posibilidat pa lesa e informashon di e siudadano elektrónikamente ora esaki ta biaha entre Kòrsou, Aruba, Boneiru i Isla’riba. Un di e motibunan ku a opta pa ahustá e diseño di e sédula i no introdusí un diseño kompletamente nobo, ta ku implementá un ahuste den e diseño tabata hopi ménos kostoso.
Remplaso di sédula
For di awor tur siudadano ku mester risibí un sédula lo risibí e vershon nobo. Esaki ta konta tambe pa personanan ku mester remplasá nan sédula. Sinembargo, ta pidi un-i-tur pa sigui usa nan sédula aktual si esaki no a kaduká i remplaso no ta nesesario. Kada siudadano lo risibí e sédula nobo na momentu ku e sédula aktual kaduká i ta nesesario pa remplasá e sédula ku esun nobo. Un-i-tur por sigui traha sita a traves di Bentana di Informashon òf sita.gobièrnu.cw pa apliká pa un sédula nobo i remplasá e sédula ku a kaduká.
INTRODUKSHON MINISTER ORNELIO MARTINA ENKARGÁ KU MANEHO DI MINISTERIO DI GOBERNASHON, PLANIFIKASHON I SERVISIO PÚBLIKO
Representantenan di Maneho di Kranshi,
Miembronan di prensa,
Demas invitadonan,
Bon siman,
Danki pa boso presensia awe, na e momentu ku nos lo kompartí un paso históriko pa loke ta trata desaroyo di nos identidat. Awe, 11 aña despues ku nos a bira pais independiente den Reino, Kòrsou ta introdusí su sédula ku ta karga nos propio identifikashon. Aparte di e aspekto emoshonal importante akí, e sédula nobo tin benefisio práktiko ku lo fasilitá biahamentu entre Kòrsou i nos islanan ruman di èks Antias Ulandes.
Permití mi felisitá e tim bou di maneho di Sra. Haddocks pa e bon trabou ku nan a realisá, pa awe nos sédula nobo por a bira un realidat. Tambe mi ke gradisí henter e tim pa e tremendo esfuerso ku nan ta hasi pa tur dia di nobo mehorá e servisio akí na Kranshi.
Manera mi a menshoná, nos tarheta di identifikashon nobo ta karga nòmber i identifikashon di Kòrsou.
E sédula ta kontené e film holográfiko, meskos ku e tarheta di reibeweis aktual. Un adelanto sigur ta e asina yamá Machine Readable Zone patras di e karchi, ku ta un banchi ku informashon kodifiká, den e mésun estilo ku nos pasport. Esaki ta brinda e posibilidat pa den futuro serkano, e siudadano su informashon keda lesá elektrónikamente ora e biaha pa nos hermano islanan.
A opta pa solamente ahustá e diseño di e sédula nobo, en bes di introdusí un diseño kompletamente nobo. Un di e motibunan ku a skohe pa esaki ta pasobra ahustá e diseño tabata ménos kostoso.
Nétamente esaki tambe ta pas den e espíritu di e tempu ku nos ta biba aden aktualmente.
Shonnan: E paso ku nos ta dal awe ta parti di nos herensha, ku a kuminsá na aña 1965 ora nos a introdusí un tarheta di identidat pa siudadanonan di Antias Ulandes.
Riba 23 di Mei 2002 a introdusí e sédula ku tamaño di un tarheta di krédito. Na mes momentu a hasi e periodo di balides 5 aña en bes di 10 aña. Promé ku e tempu ei, e siudadano mester a bini ku su mes pasfoto na momentu ke e mester a laga traha su sédula. Ku introdukshon di e sédula na 2002, e parti ei a keda adaptá. Kranshi mes a kuminsá saka e pòrtrèt.
Awe 26 di yüli 2021, nos ta dal un paso mas den desaroyo di nos tarheta di identifikashon.
For di awe, tur siudadano ku mester risibí un sédula, ta risibí un sédula nobo. Personanan ku mester remplasá nan sédula tambe lo risibí e vershon nobo di nos sédula. Ta pidi un-i-tur pa sigui usa bo sédula ku bo tin aktualmente trankil. Kada siudadano lo risibí e sédula nobo na momentu ku su sédula kaduká i ku e mester remplas’é. Laga nos sigui traha sita a traves di Bentana di Informashon òf via sita.gobièrnu.cw pa por apliká pa un sédula nobo i remplasá e sédula ku a kaduká manera ta nos bon kustumber.
Ku plaser mi ta risibí e promé sédula nobo na nòmber di pueblo di Kòrsou.
