Debí na maneho monetario mas stringente riba merkado finansiero internashonal CBCS ta bolbe hisa su tasa di interes ofisial

Debí na maneho monetario mas stringente riba merkado finansiero internashonal
CBCS ta bolbe hisa su tasa di interes ofisial

WILLEMSTAD/PHILIPSBURG – Centrale Bank van Curaçao en Sint Maarten (CBCS) lo adoptá un
maneho monetario mas stringente, oumentando su tasa di interes ofisial (‘beleningsrente’) ku 1,25
punto porsentual, te na 4,75%. ‘Tasa di interes ofisial’ ta e tasa ku CBCS ta ofresé e bankonan
komersial pa fiansa den kaso ku nan tin falta di likides. E oumento aktual di e tasa di interes ofisial
ta reflehá un oumento adishonal proyektá di e tasanan di interes riba merkado finansiero
internashonal, partikularmente e tasa di reserva federal estadounidense. Maske e reserva ofisial
bruto i e kobertura di importashon ta sigui na un nivel sólido, nan a ekshibí un tendensia di bahada
den transkurso di 2022 i ta premirá ku nan lo baha mas den 2023. Pa e motibu akí, CBCS su Komité
di Maneho Monetario (MPC) 1 lo sigui vigilá djaserka e desaroyonan ekonómiko i monetario den e
union monetario i adaptá su maneho monetario si ta nesesario.
Komo konsekuensia, entre otro di e inflashon persistentemente haltu ku ta frena forsa di kompra
di e konsumidó, e kondishonnan di finansiamentu mas stringente, i e efektonan indirekto di e guera
na Ukrania, kresementu ekonómiko mundial a moderá supstansialmente na 2022 i e tendensia ei
lo kontinuá na 2023. Apesar di e nivel haltu di inflashon, Produkto Interno Bruto (PIB) real a sigui
krese na tur dos pais di e union monetario na 2022. ‘Segun e sifranan preliminar, Kòrsou lo registrá
un kresementu di 5,9% den su PIB real, mientras ku Sint Maarten lo registrá un kresementu di 5,1%.
Na ambos pais, loke a sostené e kresementu akí tabata prinsipalmente un rekuperashon den
turismo di estadia’, segun direktor ehekutivo di CBCS, dr. José Jardim. A baha e proyekshon
ekonómiko pa 2023 prinsipalmente pa motibu ku ta premirá un bahada den kresementu
ekonómiko di e partnernan komersial prinsipal di e union monetario, ku ta Estádos Unidos i
Hulanda. ‘Na 2023, e kresementu ekonómiko real lo baha na tur dos pais di e union monetario, te
na 2,7% pa Kòrsou i 3,3% pa Sint Maarten’, dr. Jardim a sigui splika.
E preisnan haltu tantu di krudo komo di otro materia prima riba merkado internashonal a pone e
union monetario su relashon di interkambio deteriorá rápidamente. Pa e motibu aki, e défisit riba
kuenta koriente di balansa di pago a krese mas rápido ku loke a premirá inisialmente na 2022.
Maske ta proyektá un bahada den preis di krudo riba merkado internashonal, e défisit riba kuenta
koriente lo keda práktikamente meskos na 2023 ya ku, debí na un bahada den demanda eksterno,
entrada di divisa, prinsipalmente di aktividat turístiko, lo oumentá ménos. Mirando ku
1 Komité di Maneho Monetario ta deliberá un òf mas biaha pa kuartal riba e desaroyonan ekonómiko i monetario, i riba e
direkshon di maneho monetario. Komité di Maneho Monetario ta tuma desishon riba direkshon di maneho monetario i uso
di e instrumentonan di maneho monetario, pa despues Hunta di Maneho di CBCS ratifiká esakinan.
finansiamentu eksterno i e transferensianan di kapital lo no ta sufisiente pa kubri e défisit riba
kuenta koriente, ta proyektá un bahada den reserva ofisial bruto pa 2022–2023. Fuera di esei,
segun e kálkulonan di mas resien, na 2022, kobertura di importashon lo kai te na 4,5 luna, aunke
ainda esaki ta kómodamente riba e norma di 3 luna. Sinembargo, for di òktober, por a kuminsá
mira un kambio den e nivel di likides di e bankonan komersial, markando asina un fin na e tendensia
di bahada ku a kuminsá na mart di e aña akí.
Pa frena e inflashon persistentemente haltu, Reserva Federal Estadounidense (Fed) a oumentá su
tasa federal na seis okashon den 2022. Na e último kuater okashonnan, Fed a oumentá su tasa di
interes ku 0,75 punto porsentual, hibando esaki te na 3,75%-4,00% dia 2 di novèmber 2022.
Merkado ta antisipá ku, na desèmber di e aña akí, Fed lo bolbe oumentá e tasa di reserva federal
estadounidense. Oumento den e tasa federal tin un efekto inmediato riba e tasanan di merkado
monetario internashonal i, tambe riba e tasanan di interes riba merkado di e union monetario di
Kòrsou i Sint Maarten, debí na e tasa di kambio fiho entre NAf. i dòler estadounidense.
‘Mirando tur esaki, CBCS a disidí di oumentá su tasa di interes ofisial entrante 29 di novèmber 2022
ku 1,25 punto porsentual, hibando esaki te na 4,75%. Esei lo bira e di tres ahuste pa e aña akí. Por
lo demas, CBCS lo sigui konsentrá riba alargá e plaso promedio di e sertifikadonan di depósito (na
ingles, CD) ku ta den sirkulashon. Pa logra esei, ta ofresiendo plaso mas largu (di 12, 26 i 52 siman)
na e emishonnan di CD ku ta tuma lugá kada dos siman. ‘Despues ku a introdusí e kambionan den
maneho di CD na sèptèmber, tabatin un oumento den e proporshon di sertifikado ku plaso mas
largu, i esaki a yuda hisa e plaso promedio di e sertifikadonan den sirkulashon. CBCS lo sigui stimulá
e bankonan komersial pa tene mas tantu fondo den e merkadonan lokal, pa asina mantené un
posishon sólido di divisa’, asina dr. Jardim a deklará.
Jardim a splika ku e faktornan di riesgo ku por afektá e perspektiva ekonómiko di e union
monetario ta supstansial i predominantemente negativo. E faktornan di riesgo mas importante ku
por afektá e perspektiva ta: efekto indirekto di e guera na Ukrania, un inflashon konsiderablemente
mas haltu ku a premirá (loke lo afektá entrada disponibel) i un kresementu mas lento ku loke a
antisipá òf kisas asta un reseshon na e partnernan komersial prinsipal di e union monetario. Un
maneho monetario i kondishon di finansiamentu internashonal mas stringente ku loke a premirá,
oumento adishonal di balor di dòler estadounidense, otro krísis internashonal di salubridat, un
bahada adishonal den kapasidat di stul di e aerolíneanan i den transporte aéreo, desaster natural i
kondishon di wer ekstremo ta algun faktor ku por tin un efekto negativo riba e perspektiva
ekonómiko di e union monetario. Fuera di esei, implementashon di medida di ousteridat
presupuestario ku no ta laga espasio pa invershon públiko por peligrá e ritmo di rekuperashon
ekonómiko tantu na Kòrsou komo na Sint Maarten. Mas aleu, i esaki ta konta prinsipalmente pa
Kòrsou, e desbalanse aktual riba merkado laboral ta keda un faktor ku por tin un efekto negativo.
En kambio, si reanudá e aktividatnan di refineria, esei por kontribuí na un ritmo di rekuperashon
ekonómiko mas rápido ku loke a premirá. Na Sint Maarten, retraso den e aktividatnan di
rekonstrukshon por tin un efekto negativo riba kresementu ekonómiko.

Willemstad, 28 di novèmber 2022
CENTRALE BANK VAN CURAÇAO EN SINT MAARTEN

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: