Preguntanan relashona ku waf na Sorobon

 

 Na Kolegio Ehekutivo di Entidat Públiko di Boneiru

Parke Wilhelmina #1

Kralendijk

Bonaire C.N

 

Apresiabel Kolegio,

 

Dia 3 di mei 2021, mi a dirigí un karta na Kolegio Ehekutivo relashoná ku e proyektonan di renobashon di waf di Chachacha i e waf di piskadó na Playa Pabou. Tambe mi a puntra si tin plannan pa drecha e waf na Sorobon i si lo konstruí slepwaynan na Playa Frans i Te Amo Beach.

 

Te ku dia di awe mi no a risibí ningun kontesta riba e preguntanan ku segun ami lo mester ta masha fásil pa kontestá i asina informá Raad tokante ehekushon di sierto proyektonan i plannan pa proyektonan ku ta na bienestar di pueblo Boneriano. Ademas esaki ta duna kontenido na e prinsipio di transparensia di gobernashon i evitá diskushon- i spekulashonnan innesesario riba retnan sosial. A ubiká e servisio di informashon den un lokalidat sumamente moderno, luhoso i kostoso; nos mester por laga e servisio funshoná tambe optimalmente, informando e pueblo di desaroyonan den nos komunidat.

 

Den e dianan tras di lomba mi a tuma nota atrobe di un kantidat di diskushon i spekulashon riba e proyekto di renobashon di e waf di Sorobon. No tin duda ku e waf meresé atenshon urgente den kuadro di seguridat, pero tambe den kuadro di fasilidatnan pa nos piskadónan ku ta un sektor primario pa nos pueblo.

 

Pa trese klaridat den e proyekto aki i e proseso i prosedura ku a kana, mi ta hasi uso di nos Reglamentu di Òrdu, artíkulo 45,  pa hasi algun pregunta i ta urgi gobièrnu pa kontestá mi oral, al kaso, den e próksimo reunion públiko di Konseho Insular:

 

1. Kolegio por duna Raad un splikashon detayá di e proyekto aki?
2. Tabatin destaho públiko òf “ onderhandse gunning”  pa e proyekto aki?

 

1. Kolegio por fasilitá Raad, e bestèk i e presupuesto aprobá pa e proyekto aki?
2. Kuantu kompania a inskribí pa e proyekto?
3. Kua kompania a haña e aprobashon pa ehekutá e proyekto?
4. Ken òf kua kompania a keda enkargá ku supervishon di e proyektonan?

 

Mi ta spera ku den un tempu relativamente korto Kolegio lo por fasilitá Raad e kontestanan riba e preguntanan menshoná i de paso kontestá tambe esnan hasí den mi karta di 3 di mei 2021.

 

Atentamente,

 

___________________________

 

Désirée E. Coffie

Miembro di Konseho Insular Boneiru