Preguntanan di Daisy relashona ku situashon na Mariadal

Na:     Kolegio Ehekutivo di Entidat Públiko Boneiru

Plaza Wilhelmina 1

Kralendijk

Bonaire

 

Apresiabel Kolegio,

 

 

Resientemente, gerensia di Fundashon Mariadal durante un kon­fe­ren­sia di prensa a bati alarma pa loke ta e situashon den nos úni­ko hòspital aki na Boneiru. E situashon ta di tal forma ku a in­sti­tuí un tim di krísis pa atendé ku e situashon. A papia di kódigo oraño. Tambe a hasi menshon di falta di personal kualifiká pa por sigui garantisá kuido na nivel den e instituto. E notisia aki a hala atenshon hasta te den Tweede Kamer, kaminda miembro­nan di Tweede Kamer lo yama e gobernantenan responsabel pa salubridat pa bin informá kiko ta pasando.

 

Aki na Boneiru te ku awe nos di Konseho Insular no a risibí ningun informashon tokante e situashon na Mariadal ni direkta­men­te for di e fundashon mes, ni tampoko via Kolegio Ehekutivo ku tambe ta karga parti di e responsabilidat di salubridat públiko. Den e kaso spesífiko ta trata di nos siudadanonan ku ta biba i traha riba nos teritorio di kual tin menasa alarmante pa ku nan kuido.

 

Pa tal rason, hasiendo uzo di artíkulo 45 di reglamento di órden, suskrito komo miembro di Konseho Insular ta dirigí su mes na Kolegio Ehekutivo ku e siguiente preguntanan ku e petishon pa kontestá nan verbal den e próksimo reunion públiko di Konseho Insular.

1. Kolegio Ehekutivo ta na altura formalmente di e situashon ku a surgi na Fundashon Mariadal, kual ta manehá e úniko hòspital aki na Boneiru?
2. Kolegio Ehekutivo por splika en ekstenso kiko i kon e situa­shon aki ta? Porfabor no ku si òf no.
3. Kolegio Ehekutivo por(laga) splika kiko ke mèn kódigo oraño i ki nivel di krísis esaki ta representá i ki konsekuen­sia esaki por tin?
4. Kon e Fundashon ta garantisá operashon normal di e insti­tu­to di moda ku sitanan ku spesialistanan ta kontinuá nor­mal, operashonnan kirúrgiko por kontinuá manera planiá i drumimentu den hòspital pa opservashon i/o rehabilitashon ta garantisá?
5. Ta bèrdat ku personal kualifiká ta bandonando e instituto pa motibu di kondishonnan laboral primario (esta salario) ta ma­lu den komparashon ku merkado?
6. Ki medida a tuma riba korto i largo plaso pa atraé personal kualifiká pa garantisá kuido na nivel na Mariadal?
7. Ta bèrdat ku tin un disputa serio entre Mariadal i ZJCN pa loke ta finansiamentu di e kuido ku ZJCN ta kumpra serka Mariadal?
8. Ki efekto e disputa aki tin riba:

• Kalidat di kuido, tantu pa loke ta trata personal kualifiká komo aparatonan i makinarianan?
• Pagonan di salario i otro kondishonnan laboral akordá den CAO?
• Kuponan di trabou eksistente?

9. Kolegio Ehekutivo ta di opinion ku si for di 10-10-10 salu­bri­dat públiko, kayendo bou di responsabilidat di Hulanda, basá riba inspekshonnan ophetivo a yega e nivel di kuido kom­para­bel i akseptabel na Hulanda.?
10. Si pregunta 8 su kontesta ta afirmativo, Kolegio Ehekutivo no ta di opinion ku e kondishonnan laboral pa e mesun funshon­nan aki na Boneiru mester ta ekivalente ku esnan na Hulanda i hasta kisas mas, mirando nos sirkunstansia­nan lokal den Karibe? Mi ta referí aki na entre otro nos historia, nos malesanan spesífiko, nos preshon di trabou (nos ta mas multifunshonal ku koleganan na Hulanda), nos kan­ti­dat di ora (40 versus 36)?
11. Si Kolegio Ehekutivo ta di akuerdo ku punto 9, ki esfuerso c.q. kòmbersashonnan formal ta hibando huntu ku sektor di kuido lokal ku ministerio pa hasi e tema aki unu di kon­sul­ta.

 

En espera di reakshon di Kolegio Ehekutivo, mi ta terminá.

 

Atentamente,

Désirée Coffie.

Miembro di Konseho Insular