Preguntanan di Daisy relashona ku situashon na Bonlab

Na:     Kolegio Ehekutivo di Entidat Públiko Boneiru

Plasa Wilhelmina 1,

Kralendijk,

Bonaire

 

 

 

Apresiabel Kolegio,

Nos ta yegando yüni 2023, kual ta e luna fatal ku ministerio a duna komo palabrashon di kumpramentu di servisio di ZJCN serka BONLAB bou di e kondishon ku un komishon lo entregá un konseho pa un manera nobo di atendé ku kuido di laboratorio na Boneiru.

 

Ta bon kla e posishon ku tantu Kolegio Ehekutivo i Konseho Insular a tuma den esaki i esei ta ku Boneiru lo mester tin dos laboratorio i e motivashonnan i argumentonan pa esaki ta bon konosí i doku­men­tá.

 

Mirando ku nos ta yegando 1 di yüni 2023 i ku nos di Konseho Insular en todo kaso no ta risibiendo ningun informashon ofisial, ami ke hasi uso di artíkulo 45 di reglamentu di órden pa hasi e siguiente preguntanan na Kolegio Ehekutivo ku e petishon pa reak­shon verbal den e próksimo reunion públiko di Konseho Insular.

 

1. Kolegio por informá Konseho Insular ku si a instalá e komi­shon pa formulá un konseho pa un manera nobo di atendé ku kuido di laboratorio aki na Boneiru?
2. Si pregunta 1 su kontesta ta afirmativo Kolegio Ehekutivo por a informá Konseho Insular:

• Ken(persona) o instansia(nan) ta forma parti di e komi­shon?
• Kiko ta e metanan formulá pa e komishon kumpli kuné?
• Na ken i/o instansia e komishon lo mester entregá e konseho final?
• Lo mester eksistí un akuerdo entre Entidat Públiko i Ministe­rio riba e konseho final?
• Por a fasilitá Konseho Insular e dekreto di instalashon di e komishon?

3. Kolegio Ehekutivo por a informá Konseho Insular ku si e Konse­ho di Komisario di Bonlab ta okupá manera statuto ta preskribí i si no ta asina kiko ta e motibu ku no ta nombra e komisarionan?
4. Kolegio Ehekutivo por informá Konseho Insular status di e kuentanan anual di Bonlab i e posishon finansiero pa fin di yüni 2023, spesialmente pa loke ta kumplimentu ku kondi­shon­nan laboral manera salario, indexering, plaka di vaka­shon, ets?
5. Kolegio Ehekutivo por informá Konseho Insular kiko ta bai pasa entrante 1 di yüli 2023 regardando Bonlab?
6. Tin un Plan Sosial riba mesa akordá pa partidonan envolví pa ta prepará pa e “worst case scenario”, esta ku mester sera Bonlab?
7. Kolegio Ehekutivo a i ta kumpli ku e desishon di Konseho Insular di a reservá e mionnan nesesario di moda ku Bonlab por kubri gastunan salarial i otro gastunan operashonal en todo kaso te ku fin di 2023.
8. Kolegio Ehekutivo ta di opinion ku mester kompartí ku Konseho Insular e posibel alternativanan ku tin riba mesa pa mantené dos laboratorio na Boneiru, inkluyendo Bonlab?
9. E echo ku Fundashon Mariadal a dekretá estado di krísis (kódigo oraño), ki efekto esaki tin riba e desaroyonan rondó di kuido di laboratorio na Boneiru?
10. Kolegio Ehekutivo asina ku e risibí e konseho final di e komi­shon, lo kompartí esaki ku Konseho Insular?

 

Sperando reakshon di Kolegio Ehekutivo, mi ta terminá.

 

 

 

Atentamente,

Désirée Coffie.

Miembro di Konseho Insular