Catharina Gardens ta ofresé hopi bèrdè i luho KONSTRUKSHON DI 21 KAS NA BENTA DEN  SEGMENTO DI ENTRADA MEDIO TA RANKA SALI

Catharina Gardens ta ofresé hopi bèrdè i luho

KONSTRUKSHON DI 21 KAS NA BENTA DEN 

SEGMENTO DI ENTRADA MEDIO TA RANKA SALI

 

WILLEMSTAD – Siete mucha di 6 pa 10 aña a inisiá e konstrukshon ofisial di Catharina Gardens. Armá ku un kuchara di mèsla i ku hèlm di protekshon, e muchanan a mustra nan abilidat den konstrukshon. Di un manera perfekto nan a pone e promé piedra pa un set di bibienda moderno, luhoso i pagabel pa e segmento di entrada medio. 

 

Riba e tereno konosí komo e kavel di ‘Bo Mes Kas’ en total 21 kas lo keda konstruí. Kontratistanan lokal ta ehekutá e proyekto. Nan lo usa materialnan di konstrukshon di alta kalidat, ku nan lo kumpra lokal, mas tantu ku ta posibel. 

 

Fleksibilidat

Un aspekto ekstraordinario di Catharina Gardens, ta e uso di hukinan bèrdè, tantu paden komo p’afó. Ta kombiná esakinan ku espasionan habrí i konekshonnan bunita entre e kambernan. Banda di por skohe entre un kas di dos òf tres piso, e propietarionan en gran parti tambe ta disidí unda ta lokalisá e kambernan den nan kas. Nan por skohe unda nan ke nan kushina, komedor, òf sala, i nan por opta pa inkluí un ofisina den lugá di un kamber èkstra. E fleksibilidat aki ta resultá den un variedat grandi di funkshonan pa bibienda, entre otro e posibilidat di kombiná bibamentu ku traha for di kas. Dor di esaki e bibiendanan ta adekuá pa diferente gruponan. Por ehèmpèl: personan ku ta kumpra un kas pa promé be, famianan, hende soltero, i hende grandi. 

 

E konstrukshon di Catharina Gardens ta den man di Edwin Slieker, desaroyadó di proyekto; i Richard Kos, spesialista finansiero. Edwin Slieker, direktor di Zalka Construction & Consultancy B.V. tin mas ku 25 aña di eksperiensia ku ingenieria, konstrukshon, i maneho i desaroyo di proyektonan na Kòrsou. Richard Kos ta direktor di Kos ta Bon, ku ta suministrá hipotek for di 2006. Huntu nan lo yuda e kumpradónan di kas di A-te-Z, inkluso konseho di hipotek i finansiamentu. 

 

Hotspot

Ku konstrukshon di Catharina Gardens e situashon di inseguridat ku tabata reina rònt di e kavel di Bo Mes Kas, ta yega na su fin. E desaroyadónan i Domeinbeheer a akordá ku huntu nan lo desaroyá e tereno. Entretantu, a finalisá e tres kasnan riba e kavel di Bo Mes Kas, i a yuda e propietarionan ku nan finansiamentu. Ademas, a integrá nan kas den e diseño di Catharina Gardens, i a asegurá ku nan por hasi uso di e area bèrdè di Catharina Gardens. Ku esaki a tuma e promé paso pa traha di e parti mas pariba di e isla un hotspot, ku ta uni bibamentu, trahamentu i rekreashon.