*”APERTURA AÑA ESKOLAR 2021/2022; NA TUR KOLEGA UN BON KOMIENSO!”*

 

SINDIKATO DOEN
*”APERTURA AÑA ESKOLAR 2021/2022; NA TUR KOLEGA UN BON KOMIENSO!”*
Nos a drenta siman di apertura di aña eskolar nobo ku un minister di enseñansa nobo, un gabinete nobo, pero e mesun ministerio i ketu bai den e mesun pandemia di Covid-19.
Te kon leu nos a siña di e aña eskolar den pandemia tras di lomba?
*Aña pasá!*
Ora asina’ki aña pasá komo sindikato nos a kuestioná ku aña eskolar ta habri den un pandemia sin ningun klase di preparashon. Te kon leu e aña eskolar akí si nos ta prepará pa e.o. brote den skol i/o un di tres lockdown?
*Nos Proposishon!*
Manera indiká na apertura di aña eskolar pasá, komo sindikato nos ta habrí i dispuesto pa duna nos aporte di un forma proaktivo.
Nos ta bolbe proponé loke nos a proponé aña pasá, esta pone nos tur ku ta stake holder den enseñansa huntu ku ministerio den su totalidat enkabesá pa minister di enseñansa ku su kolaboradónan pa di un forma struktural trata desaroyonan den enseñansa ku e pandemia akí ta/lo afektá. “Kibra ku barera di burokrasia i traha di un forma fleksibel i transparente garantisando un bon komunikashon i entendimentu entre e diferente instansha/stake holder den enseñansa.” “Ta di e forma aki so nos ta evitá konfrontashon i konfliktonan inesesario!”
*Ban hasi kos mihó!*
Awe na porta di siman di apertura di aña eskolar, sinembargo, komo representante di trahadó den enseñansa ainda nos no a haña e espasio pa duna nos aporte na e.o. kontenido di e protokòl pa aña eskolar nobo ku nos miembronan tin ku yuda ehekutá. Nos ta spera ku no ta bai bolbe kometé e eror di laga únikamente dunadó di trabou (=direktivanan di skol) ta esnan ku tin di bisa den esaki ku tur e konsekuensha ku esaki (t)a trese kuné. Pues nos no sa te ainda kiko ta spera di nos miembronan ni tampoko kiko nos miembronan por spera pa e di dos aña eskolar den un pandemia ku un variante nobo i ku sifranan di kontagio ku a bolbe subi.
*Positivismo!*
No opstante esaki nos ta habri aña eskolar ku positivismo sperando mas ku klaro ku nos a siña di e fayonan di aña pasá. Banda di esaki nos tin pendiente un reunion di ‘follow up’ ku minister van Heydoorn kaminda nos lo profundisá riba proposishonnan konkreto ku Sindikato DOEN lo presentá pa kontrarestá e impakto di Covid riba nos enseñansa.
*Reunion ku RKCS*
Tambe nos tin ku bisa ku durante fakansi Sindikato DOEN a reuní ku direktiva di skolnan katóliko (RKCS) i a yega na palabrashonnan konkreto den kuadro di trahamentu huntu salbaguardiando nos enseñansa i nos miembronan mas ku klaro. “Nos a palabrá e.o. ku nos lo reuní ku RKCS strukturalmente pa kanalisá desaroyonan den enseñansa na skol ku ta kai bou di RKCS. Esaki ta pa di un forma proaktivo traha na puntonan ku por bira konflikto, na lugá di solamente sinta na mesa ora ku e situashon ya ta un konflikto.”
*Plan di Trabou 2021/2022*
Tur esaki i mas nos lo amplia durante nos promé reunion anual statutario kaminda nos lo presentá e.o. nos plan di trabou pa aña eskolar 2021/2022 di moda ku tur nos miembronan i vèlt di enseñansa en general por haña un bon bista kiko por spera di Sindikato DOEN e aña eskolar nobo akí.
*Bon Aña Eskolar!*
Na tur kolega den enseñansa, tantu maestro komo personal di apoyo, na nos kompañeronan sindikal den enseñansa, na direktivanan di skol, mayor, alumno i studiante nos ta deseá un bon aña eskolar!
*Direktiva di Sindikato DOEN*
9 di ougùstùs 2021

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: