Segun PIN: kabinete Pisas mester buska mas personal pa yuda CMC. Mester evitá ku hende tin ku disidí riba bida òf morto

Segun PIN: kabinete Pisas mester buska mas personal pa yuda CMC.

Mester evitá ku hende tin ku disidí riba bida òf morto

 

Willemstad – 11 ougustus 2021

 

Trahadonan di Intensive Care (IC) di CMC ta pidi ousilio i ayudo públikamente, paso hospital ta a punto di introdusí e ‘Kodiko Pretu’. Ta notabel ku durante e dianan aki hopi hende a aserká PIN pa puntra dikón na aprel CMC por a handel ku mas hende ku Covid den Intensive Care (IC) sin tabatin e nesesidat di e asina yamá ‘Kodiko Pretu’.  

 

Kodigo pretu

Ta papia di ‘Kodiko Pretu’ ora ta eksistí un menasa grandi di skarsedat di kama i den nos kaso di personal di IC, lokual ta hasi nesesario pa dòkternan disidí ken por haña kuido den IC i ken no. Ta un señario tragiko ora un dòkter ku a hura pa salba tur vida, ta hañ’e obligá pa tuma desishon ken por haña e kuido nesesario i ken no. Tristu ora mester hasi e eskoho penoso di ken por haña kuido pa keda na bida i ken nos tin di laga sin kuido i hopi chèns pa muri. E ‘Kodigo Pretu’ por ehèmpel ta duna prioridat na pashèntan ku tin mas chèns pa rekuperá lihé, despues na  trahadonan den área di salú ku a keda kontagiá ku e viro, siguí pa gruponan di edat di 0 pa 20 aña, di 20 pa 40, 40 pa 60 etc. etc.

 

Skarsedat enorme di personal 

E dikón mester bai na un ‘Kodigo Pretu’ a keda spliká pa enfermera di IC i tambe dòkter di IC na CMC.  Na aprel di e aña aki CMC tabata gosa di mas di 150-piku personal ekstra ku Hulanda a fasilitá pa nos for di Merka i Hulanda. Aworaki ta solamente 10 di e 150 personal ekstra a keda na CMC! Ke men tin una falta di personal spesialisá espantoso pa por dil ku e pandemia di Covid. Ta imposibel pa e personal di IC i e demás personal, ku a traha ekstremamente duru for di maart/april i ku ta sobrekargá, atendé ainda mas hende den IC. IC ta yena shonnan!   

 

Urgensha

Hefe di kuido intensivo i alabes hefe di kamber di operashon a pinta un situashon skùr na ICU. Tin 14 hende ku Covid i 6 hende pa otro motibo den ICU. Si normal nan tin 1 enfermero spesilisá pa 2 pashènt, awor tin solamente 1 hende pa 4 pashènt. Mester interná pashènt den departamentu di hende ku problema ku kurason. Mester a saka enfermeronan for di otro departamentonan pa duna un man, ku konsekuensia ku mester bolbé posponé otro operashonnan di hendenan ku ta wardando pa lunanan largu  kaba. E hefe di kuido intensivo a rogá gobièrnu pa baha e posibilidat pa hendenan por e.o. bebe alkohol den anochi i kousa aksidentenan riba kaya. Ela alerta ku sigui asinakí, mas hende lo bai muri sin tin mester.

 

Na opinión di PIN gobièrnu mester regulá aglomerashon riba kaya mas lihé posisbel i aserká Hulanda pa pidi e asistensia di personal spesialisá nesesario.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: