Strategia Nashonal di Eksportashon pa Kòrsou ta kla!

Strategia Nashonal di Eksportashon pa Kòrsou ta kla!

Geplaatst op 23 August 2021 dor di Ministerio Desaroyo Ekonómiko

 

Pendiente presentashon na minister di Desaroyo Ekonómiko

 

WILLEMSTAD – Kòrsou mester por eksportá pa nos por krese i despues di dos aña di trabou i esfuerso inkansabel, Ministerio di Desaroyo Ekonómiko (MEO) porfin a konkluí e proseso pa yega na un Strategia Nashonal di Eksportashon pa Kòrsou. Ta e intenshon ku pa e próksimo dos añanan, MEO lo bai traha riba implementashon di e strategia akí di moda ku nos ekonomia por kuminsá mustra atrobe señalnan di rekuperashon rápido di forma duradero i sano. Implementashon di e Strategia Nashonal di Eksportashon pa Kòrsou lo nifiká fortifikashon i diversifikashon di nos ekonomia, mas kupo di trabou, kresementu di invershon i diversifikashon den nos eksportashon; kual na su turno lo reflehá den un kresementu real pa Kòrsou.

E tim di MEO enkargá ku implementashon di e Strategia Nashonal di Eksportashon ta kla pa ranka sali. Intenshon ta pa komienso di sèptèmber e plan keda presentá na minister pa asina huntu ku e tim di MEO mesora trabounan por inisiá ku e meta pa brinda perspektiva na ekonomia di Kòrsou. Un perspektiva den kua ta fasilitá i atraé invershonnan estranhero, implementá proyektonan sostenibel riba área di energia bèrdè i un programa di rekapasitashon di nos forsa laboral i reformanan monetario i fiskal.

Eksportashon ta esensial pa kada pais, ounke kon chikitu e pais akí por ta. Kòrsou ta konta ku vários sektor ku ya ta ligá na eksportashon, pero ku pa un tempu kaba no tabata duna fruta debí primordialmente na desaroyonan internashonal ku, komo pais, nos no tabata tin grep riba dje. Por ehèmpel, seramentu di frontera Venezolano kual a pone ku nos mester a diversifiká i buska otro aktividatnan pa stimulá komersio. Pero tambe e pandemia di COVID-19 ku tabata un gòlpi imprevisto pa e ekonomia mundial i ku poko poko paisnan ta hasi esfuerso awor pa rekuperá.

International Trade Centre (ITC), un agensia di Nashonnan Uní i World Trade Organization (WTO) a duna guia na MEO pa por a realisá nos propio Strategia Nashonal di Eksportashon. Mas di 200 profeshonal i eksperto di diferente organisashon i for di vários sektor na Kòrsou, a partisipá durante di e dos último añanan den e proseso pa por a konkretisá e strategia akí. E sektornan ku sigur ta keda stimulá pa medio di e Strategia Nashonal di Eksportashon, ta Servisionan Finansiero Internashonal, Servisionan di Haf i Servisionan Marítimo, Teknologia di Informashon, Servisionan di Edukashon Transnashonal, Sektor Kreativo i Turismo. Pa kada sektor a traha tantu un strategia komo e plan di implementashon korespondiente pa esaki. Banda di e sektornan identifiká, a traha riba e kondishonnan pa garantisá implementashon eksitoso di e plan. A desaroyá vários strategia di implementashon pa fasilitá tur sektor di ekonomia, manera sektor di manufaktura, agrikultura, i konstrukshon pa menshoná algun.

Na komienso di sèptèmber Minister di Desaroyo Ekonómiko lo tin un dokumento ku lo ta kla pa ranka sali rumbo pa rekuperashon ekonómiko. Tanten e tim di MEO ta kontinuá ku tur preparashon nesesario pa konkretisá e plan pa realisashon di un ekonomia resiliente, diversifiká i ku ta brinda un futuro prometedor pa pueblo di Kòrsou riba término kòrtiku, medio i largu. Di e forma akí realisando e vishon di nos Strategia Nashonal di Eksportashon kual ta “Curaçao: where business succeeds!” (Kòrsou kaminda negoshi(nan) ta eksitoso!).

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: