Tas di kompra ku diferente tep pa prevenshon BSure i Brantwer Kòrsou ta konsientisá komunidat pa Prevenshon di Kandela

Tas di kompra ku diferente tep pa prevenshon

BSure i Brantwer Kòrsou ta konsientisá komunidat pa Prevenshon di Kandela

 

WILLEMSTAD – BSure huntu ku Brantwer Kòrsou ta djòin pa duna nan aporte den konsientisashon di nos komunidat riba e prevenshon di kandela. Brantwer Kòrsou pa un tempu kaba tin e kampaña “Prevenshon, e mihó Opshon”, den kua nan ta konsientisá pa prevenshon di kandela i pa purba redusí e kantidat di kasnan ku ta kima. For di aña 2017 Brantwer Kòrsou a tuma nota ku tin un kantidat haltu di kas ta kima i ku sifranan di kandela ta oumentá. Tambe den sierto kasonan, e situashon penoso den kual tin víktima ta fayesé a konsekuensia di un kandela. Durante aña 2020 Brantwer Kòrsou a duna un total di 1288 asistensia, di kua un total di 97 edifisio, i for di esaki 55 tabata un kas. Durante aña 2020 a konosé lamentablemente 3 víktima a konsekuensia direkto di un kandela. 

 

BSure a mira e importansia di yuda Brantwer Kòrsou pa konsientisá komunidat di Kòrsou kua ta e akshonnan ku por tuma pa evitá un kandela, prevení pèrdida di un ser kerí i huntu a yega na e idea pa repartí tas reusabel “shopping bag” ku informashon i tepnan balioso pa prevenshon di kandela. E tasnan reusable akí, ku un banda un bunita diseño di BSure i na e otro banda kolónan di Brantwer Kòrsou ta disponé di diferente tep ku un persona mes por hasi na kas pa prevení un kandela. E intenshon ta, ku na momentu ku e persona partisipá na un di e charlanan di prevenshon di kandela serka personal di Brantwer Kòrsou, e lo risibí un tas kual ta yuda konsientisá otronan tambe pa prevenshon kontra kandela. Brantwer Kòrsou lo inisiá pronto e repartishon di e tasnan aki durante e charlanan ku e meta pa promové konsientisashon riba prevenshon di kandela den nos komunidat pa medio di e kampaña: “Prevenshon, e mihó Opshon”.