Kontribuyendo na mas aktividat ekonomiko i empleo AQUALECTRA TA FIRMA AKUERDO DI TRABOU KU 6 KONTRATISTA LOKAL PA KREA RET DI DISTRIBUSHON INTELIGENTE

Kontribuyendo na mas aktividat ekonomiko i empleo

 

AQUALECTRA TA FIRMA AKUERDO DI TRABOU KU 6 KONTRATISTA LOKAL PA KREA RET DI DISTRIBUSHON INTELIGENTE

Willemstad – 5 di òktober – Aqualectra a firma un Akuerdo di Trabou (MoU) ku seis kontratista lokal pa ehekushon di e proyekto pa krea e ret di distribushon inteligente di awa i koriente na Kòrsou. Ta trata di kontratistanan Curaçaose Wegenbouw Maatschappij, ELUX Technologies, MNO Vervat Curaçao, Kla Pa Solushon Elektra, Curaçao Industrial Services i Miart Step Up OV & More. Ya pa algun luna Aqualectra a bin ta prepará pa instalá su meternan inteligente rònt Kòrsou komo parti di proyekto AMI. AMI ta para pa Advance Metering Infrastructure kual ta nifiká básikamente un ret di distribushon inteligente. Promé ku yega na e akuerdo di trabou, Aqualectra a realisá periodo di prueba na Seri Domi, Trai Seru i na Bonam. A hasi esaki pa haña un bon bista di e diferente aspektonan di e trabou pa asina realisá e proyekto grandi aki debidamente.

 

Aqualectra su meta prinsipal tras di e proyekto ta pa inová for di operashon te un mihó servisio na kliente. E proyekto lo dura tres aña i ta konta ku un invershon di 151 mion florin. Parti di e montante aki ta pa kompra di e meternan pero otro parti ta bai na pago di labor di e kontratistanan.  Esaki ta kontribui na mas aktividat ekonomiko i kupo di trabou den nos komunidat.   Dor di e magnitut di e proyekto i kantidat di trabounan regular diario ku tin, Aqualectra a skohe pa logra su meta dor di traha den koperashon estrecho ku ekspertonan lokal pues nos kontratistanan lokal. 

 

E kontratistanan lo implementá e proyekto pa krea ret di distribushon digital i inteligente den diferente fase. Primeramente, nan lo inspektá e área kaminda e meternan ku tin aktual ta pegá, kaminda ta nesesario nan lo hasi trabou di reparashon, i seguidamente nan lo kambia e meternan di awa i koriente na tur kas i negoshi. Aqualectra ta sumamente orguyoso ku e akuerdo di trabou i ta spera di por traha di forma efisiente i efektivo durante e próksimo tres añanan benidero ku e tim kapasitá aki pa instalé ret di destribushon di awa i koriente inteligente di Kòrsou pa futuro.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: