Minister Middelhof ta hasi bishita di sorpresa na Parlatino na Republica Dominicana pa trese klaridat riba seguridat alimentario i komèrsio sostenibel
Minister Middelhof ta hasi bishita di sorpresa na Parlatino na Republica Dominicana pa trese klaridat riba seguridat alimentario i komèrsio sostenibel
Minister di Desaroyo Ekonómiko, Roderick Middelhof, a hasi un bishita di sorpresa na PARLATINO na República Dominicana, kaminda el a trese mas klaridat tokante e pasonan ku Kòrsou ta tumando pa fortalesé seguridat alimentario i stimulá un komèrsio mas sostenibel.
Durante su intervenshon, Minister Middelhof a enfatisá ku seguridat alimentario ta un tema ku ta bira kada bes mas importante pa Kòrsou. Ku kresementu di ekonomia, i partikularmente ku e desaroyo kontinuo di turismo, demanda pa alimento lo sigui krese. P’esei, segun e minister, Kòrsou mester hasi su ekonomia ménos vulnerabel i sigui invertí den kapasidat pa produsí mas alimento lokalmente.
“Kòrsou ta importa kasi tur su alimento for di eksterior. Mientras nos ekonomia i turismo ta sigui krese, nos mester sigui traha pa garantisá ku nos por disponé di sufisiente alimento pa nos pueblo. Seguridat alimentario no ta solamente un reto di awe, sino un invershon den futuro di Kòrsou,” Minister Middelhof a indiká.
Den kuadro di e meta aki, Ministerio di Desaroyo Ekonómiko a aloká XCG 1,4 mion pa un programa di préstamo destiná pa duna agrikultornan i emprendedónan lokal oportunidat pa ekspandé nan produkshon òf kuminsá un negoshi den sektor di produkshon alimentario.
Ademas, gobièrnu ta pone tereno disponibel pa diferente tipo di proyekto ku por kontribuí na fortalesementu di seguridat alimentario. Esaki ta inkluí, entre otro, desaroyo di granhanan di galiña, produkshon di webu, plantashon di bèrdura i fruta, i otro forma di produkshon lokal.
Minister Middelhof a splika ku e meta no ta pa eliminá importashon, sino pa logra un mihó balansa entre importashon i produkshon lokal. Asina Kòrsou por bira ménos dependiente di desaroyonan internashonal, fortalesé su propio emprendedónan i, na mes momento, krea mas oportunidat ekonómiko lokal.
E bishita na PARLATINO ta forma parti di e esfuerso di Minister Middelhof pa posishoná Kòrsou regionalmente komo un partner ku ta buska seguridat alimentario, komèrsio sostenibel i kresementu ekonómiko duradero.
