Elsa Rozendal, lider di Democraat: Digitalisashon ta bon pero tene kuenta ku nos grandinan.
Elsa Rozendal, lider di Democraat: Digitalisashon ta bon pero tene kuenta ku nos grandinan.
Willemstad—Awor ku Gobièrnu di Kòrsou a introdusí e prueba di bakunashon digital (Curaçao Health App), ku ta mará na e ‘EU Digital Covid Certificate’ pa ora ta biaha pa Hulanda i Oropa, ta importante pa nos hendenan i speshalmente nos grandinan, haña e guia nesesario pa hasi e registrashon ku fasilidat.
Mas ainda pa e echo ku e prueba di bakunashon digital, den forma di un Qr-Code, ta bai sirbi despues komo prueba di entrada na lugánan públiko.
Gobièrnu di Kòrsou, mester tene kuenta ku no ta tur hende i sigur nos grandinan, ta abil ku nan selular òf mobile device pa hasi uso di e prueba di bakunashon digital.
Segun Rozendal, mester duna nos grandinan e asistensia nesesario pa nan tambe por disponé di e rekesitonan pa por hasi uso di instrumentonan digitalisá. Hopi di nos grandinan lo tin un yu òf nietu pa atendé e telefòn i instalá e app pa nan pero hopi tambe lo no tin e posibilidat aki òf no tin un ‘modern device’ at all.
Mas ainda e nesesidat tei pa eduká nos hendenan, en espeshal nos grandinan, pa por hasi uzo di sistemanan i instrumentonan digital, mirando ku Gobiernu di Kòrsou pa medio di un enkuesta digital, a kuminsá sondea kon pueblo ta pensa di un tranformashon digital pa Kòrsou.
Democraat ta urgi Gabinete Pisas pa duna e asistensha nesesario na esnan ku mester di dje, sigur pa loke ta trata e prueba di bakunashon digital ku ta bai bira un eksigensia mundial.