ASEPTA KU NOS NO POR SIGUI KOMPARA NOS MES KU EUROPA
ASEPTA KU NOS NO POR SIGUI KOMPARA NOS MES KU EUROPA
Mi ta sinti falta di sinseridat di nos hendenan pa ku e pueblo. Ya pa ultimo 20 aña nos ta purba di keda biba ku un nivel ku realmente nos no por wanta mas. Si antes nos tabata por a bai kumpra fastfood dos pa tres biaha pa siman, awor aki un biaha pa luna, anto kisas. Mester asepta ku ta yega un tempu ku hopi kos ku nos tin awor aki lo pasa pa historia. Entre otro no por keda ku un hende no ta traha nunka, anto ora kumpli 65 aña ta disfruta di penshon. Un persona ta traha semper, pero den pretu manera sa wordu bisa i tog ta bin na remarke pa penshon. Mi ta bai duna un ehempel. Un persona ta drecha su outonan na kas. E ta traha 45 aña na su kas drecha outo (bou di palu), e ta yega edat di 65 bai kobra fl. 862,-. Hopi biaha nan ta kobra onderstant tambe durante di 45 aña. Esei ta nifika ku semper estado a kria un hende asina aki i no a risibi net nada akambio. Mesun kos mi por bisa di hopi ku ta hasi kabei, hasi uña etc. SVB no ta risibi net nada di nan pero si mester kumpli ku nan gastunan mediko. Laga nos bira sinsero ku otro (ku pueblo). Ban pa tur hende kontrubui na e pais aki. Gastunan ta birando hopi haltu pa tur hende. Pasa awor aki den barionan ku ta elite den wikent i bo ta topa ku e personanan aki mes ta hasi trabou di limpia kura, ferf etc. Algu ku antes nan tabata buska hende pa hasi. Ta sinial ku ya hopi a hala faha mara. Job chikitunan a bira asina scars. Mi a trese e kaso aki dilanti pero tin masha hopi mas ku estado lo mester atende kune awor aki i no por warda mas. Ta nos berdatnan ku ta sunu den nos kara. Bo ta risibi 10 heldu pa luna, gastunan ta 14. Bo por hinka den otro algun aña, pero ta yega e dia ku kos ta pega. Korsou, asepta ku nos a pega.Esaki ta un di e tantisimo kasonan ku nos mester bai atende kune riba e isla dushi aki. Mi ta spera di duna un kontribushon na e komunidat aki.
Johnny Isabella