Cft: “Awor ta kuestion di implementá” 

 

 

Cft: “Awor ta kuestion di implementá” 

Willemstad – Gobièrnu di Kòrsou ta pará dilanti di retonan grandi i e por usa e revitalisashon ekonómiko aktual pa implementá mehorashonnan struktural. Esaki Kolegio di supervishon finansiero  Kòrsou i Sint Maarten (Cft) a indiká den kòmbersashonnan ku resientemente el a sostené ku gobièrnu di Kòrsou. Kòrsou mester baha su gastunan i hisa su entradanan, entre otro pa medio di mehorashon den kobramentu di impuesto. Pa evitá un subida mas aleu di e debe nashonal, ta nesesario pa alkansá ekilibrio riba e kuenta regular di e presupuesto. Mester implementá den forma diligente e reformanan ku ta nesesario pa por garantisá un kuido i seguridat sosial pagabel. Asina ei riba término korto ta evitá ku pais mester hasi kontribushon adishonal na seguridat sosial. Riba término mediano Kòrsou lo mester garantisá ku e sistema sosial lo keda pagabel pa futuro generashonnan tambe.

Kòrsou su debe nashonal aktualmente ta ANG 4.196 mion. Kòrsou a inisiá un proyekto pa hisa entradanan (di impuesto) ku e meta pa eliminá e retraso den e proseso pa kobra impuesto (ponementu di aanslag) i kobra debenan di impuesto habrí. Esaki mester kondusí na un mihó kumplimentu ku impuesto (compliance) di parti di esnan ku aktualmente tin e deber di paga impuesto i tambe e lo kondusí na haña mas entrada. Pa evitá ku e debe nashonal ta sigui subi, ta nesesario pa kontrolá e gastunan tambe. Un mehora den e proseso presupuestario i e siklo di responsabilisashon, maneho finansiero i e manera di duna kontenido na e akshonnan di e entidatnan di gobièrnu ta esensial pa logra realisá e propósito aki.

Presupuesto 2022

E proyekto di presupuesto pa 2022 ta mustra un défisit di ANG 262 mion riba e kuenta regular. Gobièrnu di Kòrsou por redusí e défisit aki si e sigui redusí su gastunan i hisa su entrada. Banda di medidanan pa drecha kumplimentu ku impuesto, reforma di impuesto tambe ta nesesario, i loke mester ta sentral dren esaki ta ampliamentu di e base di impuesto den kombinashon ku redukshon di karga atministrativo. Den e proyekto di presupuesto ku aktualmente ta den Parlamentu tin un kontribushon adishonal den e fondo ku ta fluktua (schommelfonds) pa 2022, lokual lo no ta nesesario mas. Minister di Finansa a primintí ku den e kuadro aki e lo bai entregá un nota di kambio riba e proyekto di presupuesto.

Kuenta regular balansá den 2023

Ku e fin di evitá ku e debenan lo sigui oumentá, e kuenta regular mester ta balansá den 2023. Esaki ta rekerí kòntròl di gastu di tur ministerio. Pa e añanan despues lo yega na surplus kual lo usa pa paga e debe i pa duna kontenido na e reglanan di kompensashon di défisit ku ta inkluí den e Lei di Reino supervishon finansiero (Rft). Banda di esaki lo tin di hasi palabrashon adishonal tokante di e fiansanan di likides ku ta vense 1 di aprel 2022. A keda akordá ku ta bini bèk riba e tópiko aki den e di kuater reportahe di ehekushon di 2021, den kua entre elo mester bini na kla kuantu otro défisit di 2021 de fakto lo ta. 

Invershon dirigí nesesario 

Kòrsou tin di haber ku un kaida ekonómiko di durashon largu i ademas e pais a keda afektá fuertemente tambe pa e pandemia di korona. Den e di dos mitar di 2021 por mira klaramente un revitalisashon di e ekonomia, prinsipalmente den e sektor hospitalario/turismo. Segun e último pronóstiko, otro aña Kòrsou su ekonomia lo krese ku 6,2%. Ta di sumo importansia pa e maneho finansiero di gobièrnu bira na òrdu despues di e krisis i pa ekonomia di Kòrsou bai krese. Reformanan ekonómiko, reforma di impuesto i kòntròl di gastu ta esensial den e kuadro aki.

Kompará ku otro paisnan den Karibe, Kòrsou por krea un bentaha pa su mes, si e ehekutá e medidanan i reformanan ku ta den e paketa di pais (landspakket). Otro kos ku lo kontribuí den e fase aktual di e krisis ta invershonnan dirigí. Mester mira kon por hasi fondo disponibel pa e fin aki, tambe den konsulta ku Hulanda.  

Riesgo di ekonomisashon den kuido i seguridat sosial

Seguridat sosial i kuido ta forma un parti importante di e presupuesto gubernamental. Kòrsou ta paga tur aña un kontribushon di ANG 306 mion na e fondonan sosial i e mester kompletá e défisitnan den e schommelfonds. Gobièrnu a tuma sierto desishon a base di kua mester evitá défisitnan den 2022 i 2023. E desishonnan aki ta rekerí ehekushon na tempu huntu ku un proseso estrikto di monitoreá i tambe mester hinka nan den reformanan struktural pa por hasi e seguridat i kuido bira pagabel riba término largu tambe. Cft a ekspresá su preokupashon ku ehekushon di e palabrashon hasí, esta ku lo kompensá e gastunan operashonal di Curaçao Medical Center kual ta mas haltu kompará ku esnan di Sehos, a base di ekonomisashon pa medio di mas efisiensia den kuido. Prinsipalmente e ekonomisashon den gastunan di remedi no ta keda realisá mes, òf no ta keda sufisientemente. Cft a insistí pa e añanan aki dal pasonan grandi ainda riba e tereno aki. Esaki finalmente lo mester kondusí na un kontribushon mas abou di pais na e fondonan sosial. 

Cft a bishitá Kòrsou di 25 te ku 27 di òktober i a hiba kòmbersashon ku Gobernadó, Minister di Finansa, Minister di Salubridat Públiko, Medio Ambiente i Naturalesa (GMN), Konseho di Ministers, Komishon Finansiero di Parlamento, Kontrolaria General Kòrsou (ARC), Servisio di Impuesto i Banko di Seguro Sosial (SVB).

 

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: