Ala femenino di MAN ta organisá MENSTRUASHON SOLIDIARIO PA YUDA KOMBATÍ POBRESA MENSTRUAL.

October 28, 2021October 28, 2021 REDAKSHON

Ala femenino di MAN ta organisá
MENSTRUASHON SOLIDIARIO PA YUDA KOMBATÍ POBRESA MENSTRUAL.
Segun Organisashon Mundial di Salú 1 riba kada 5 hende muhé ta kai bou di e asina yama “pobresa menstrual“ den region di Karibe i na Hulanda 1 riba kada 10 hende muhé pa motibunan finansiero no por kumpra “maandverband”/kotèks.
Pobresa menstrual ta nifiká falta di akseso na produktonan di uso pèrsonal pa e periodo di menstruashon, manera p.e. “maandverband”/kotèks.
E pobresa menstrual aki a bira aun mas tantu den nos region i mundialmente debi na e pandemia di COVID-19.
Segun estudionan hasí den region di Karibe e hende muhé hopi biaha mester skohe entre kumpra kuminda pa su famia òf kumpra produkto pa su higiena pèrsonal.
Den mayoria kaso e hende muhé ta skohe pa buta su higiena pèrsonal un banda pa por duna su famia di kome. Esaki ta un situashon ku aki na Kòrsou tambe nos ta tuma nota di dje.
Segun UNICEF mucha muhénan hóben ku ta bai skol ta pèrdè un promedio di 5 dia di skol pa aña pa motibu di pobresa menstrual. Esaki ta mina e derechi universal di e hóben pa por tin akseso na edukashon sin barera.
Aki na Kòrsou na diferente okashon nos a haña señal serka dosentenan di e situashon aki. Tambe nos ta keda aserká pa mamanan ku ta pidi nos ayudo finansiero pa por kumpra produktonan di uso pèrsonal pa nan menstruashon.
Lamentablemente na Kòrsou nos no tin nos propio estudio riba nos pobresa menstrual manera otro paisnan.
Na Kòrsou tambe hopi hende muhé ta pasa den situashon fèrfelu òf nan ta pèrdè dia di trabou òf di skol pa motibu ku no tin sèn pa kumpra produktonan di uso pèrsonal pa su menstruashon. Hopi hende muhé ta haña nan den e situashon ku e menstruashon ta presentá na boka di trabou, skòl òf un luga públiko i nan no tin e produktonan ku nan tin mester di dje.
E situashon aki tin komo konsekuensia ku e hende muhé no por saka su máksimo potensial. Esaki ta kontra diginidat humano ku ta un di e pilarnan sólido di ideologia di Partido MAN komo Sosial Demókrata.
Tur loke keda kolektá riba e dos dianan aki lo keda repartí entre Voedselbank i skolnan básiko i avansá.
Di e manera aki Ala Femenina di Partido MAN ke demostrá ku menstruashon no mag di kondusí na miedu, eksklushon i bèrguensa, pa motibu ku biba ku diginidat durante menstruashon tambe ta un derecho humano.