Fundashon pa Konsumidó mester di su sak’i sanger!

Fundashon pa Konsumidó mester di su sak’i sanger!

Willemstad- Awor den tempu di krisis ku preisnan di komestibel ta subi manera nunka promé, Fundashon pa Konsumidó mester un infushon di sèn pa por tei prominentemente den media pa informá, eduká i guía e pueblo konsumidó.

Un di e tareanan básiko di Fundashon pa Konsumidó (FpK) ta pa duna informashon transparente i konfiabel na e konsumidó tokante preis, kalidat di produkto i servisionan. Kosto di bida ta sigui subi bárbaramente i mas i mas por kumpra menos ku e florin. No ta un sekreto ku últimamente varios siudadano riba un base regular ta ekspresá nan mal kontentu riba retnan sosial o den programanan di radio tokante preisnan di produkto. Hasta preisnan di produktonan den e makutu básiko di promé nesesidat, ta subi literalmente di awe pa mañan.

Na hopi okashon ta parse ku e bos di pueblo no ta yega shelu i ku e konsumidó tin ku “chup’e lemb’e” i guli e preisnan di merkado. Argumentonan manera “nos tin un merkado liber i e merkado por medio di kompetensia tin di regulá su mes” hopi biaha ta bin dilanti.
Netamente pa duna kontenido real na funshonamentu di merkado, Partido PIN ta di opinion ku gobièrnu di Kòrsou (lesa: Minister di Desaroyo Ekonómiko) mester duna FpK e atenshon i sostén finansiero nesesario pa pa FpK por hasi su trabou optimalmente, esta di investigá, prosesá, duna informashon i rekomendashon na e pueblo pa e esaki por skohe unda si òf unda no e mester hasi su kompras. Awor ku e krisis di Covid a trese subida di preis i di kosto di bida ta netamente momentu pa invertí di FpK por yuda e konsumido kompará preis pa e por kumpra mas ekonomikamente posibel.

Sigur pa e ultimo 5 añanan FpK ta chambuká k’un subsidio di gobièrnu ku ta representá solamente 46% di e presupuesto nesesario. E debilidat finansiero aki ta limitá e fundashon pa ekspande su rekursonan humano. E falta di medio ta stroba FpK di ta muchu mas aktivo i presente pa duna informashon na pueblo di Kòrsou riba un base regular, hasiendo uso di tur tipo di medio di komunikashon.

Otro tarea di FpK ta, intermediá pa e konsumidó na momentu ku tin keho riba kompra di un produkto o servisio. Aki tambe FpK lo por duna un mihó servisio na komunidat si e rekursonan nesesario ta na lugá.

Partido PIN ta urgi gobièrnu di Kòrsou pa subi e subsidio di FpK pa e fundashon pa netamente den e tempu difisil aki e por hasi su trabou optimalmente, pa e por ta muchu mas aktivo i asesibel ku informashon na bienestar di e konsumidó. Ku bista riba futuro ku ya hopi ta proyektá ku preisnan di produktonan importá lo sigui oumentá debí na gastunan di flete ku a subi eksplosivamente, ta indespensabel pa FpK por duna kontenido maksimo na su ròl di ta e wowo, orea i boka di e pueblo konsumidó.