Kondekorashon Krus di Mérito otorgá na sra. Rina Penso

 

 

Kondekorashon Krus di Mérito otorgá na sra. Rina Penso

Geplaatst op 01 November 2021 dor di Ministerio Enseñansa, Siensia, Kultura & Deporte

Willemstad – Gobièrnu di Kòrsou a otorgá kondekorashon Krus di Mérito na sra. Rina Penso riba 26 òktober 2021 den presensia di su ekselensia Gobernador sra. Lucille George Wout.  Minister enkargá ku Kultura sr. Sithree ‘Cey’ van Heydoorn na nòmber di Gabinete Pisas a hasi entrega di e Krus di Mérito den presensia di famia i amigunan den teatro Luna Blou.  Sra. Rina Penso a risibí homenahe komo un baluarte artístiko kultural ku a kuminsá foi añanan 1960 den e mundu di aktuashon.

Esaki a tuma lugá den kuadro ku Ministerio di Enseñansa, Siensia, Kultura i Deporte (ESKD) ta stimulá pueblo di Kòrsou pa ban sigui traha riba un kultura di bienestar dor di sigui “Konop’é, Als’é i Traspas’é”. Esaki ta nifiká ku huntu nos ta ban hasi uso di tur lokual tin na sabiduria di nos grandinan tokante di bienestar, i traspasá esakinan dor di duna publisidat i rekonosementu.

Kondekorashon Krus di Mérito Kòrsou ta un kondekorashon instituí pa Gobièrnu di Kòrsou, pa duna rekonosimentu na personanan ku a desplegá aktividatnan meritorio, den un forma partikular, pa komunidat di Kòrsou. Konsiderando tur e aktividatnan meritorio eksepshonal for di aña 1960 te ku awe, di sra. Rina Penso i konforme e kuadro di lei di e kondekorashon Krus di Mérito a hasi eksepshon pa otorgá e Krus di Mérito. Normalmente, konformé e ordenansa ta hasi entrega riba Dia di Bandera, esta 2 di yüli.