ANSELMUS BOY DAP EMPERADOR DI TUMBA A BAI SOSEGA



 

 

 

 

ANSELMUS BOY DAP EMPERADOR DI TUMBA A BAI SOSEGA

 

WILLEMSTAD —   Mundu Farandulero  i pueblo di Kòrsou kompletu den oranan di mèrdia dia 2 di novèmber 2021, a tuma nota di e notisia tristu ku e gran músiko, kompositor i kantante Anselmus Boy Dap ya no ta huntu ku nos mas.

Mayoria di nos pueblo konosé Boy Dap komo tumbero, pero Boy Dap tabata un intérprete di práktikamente tur género di músika. Promé ku añanan 70, el a militá den vários agrupashon musikal, kantando nos ritmonan krioyo, pero tambe bolero, guaracha, kalipso i merengue.

Un di e promé komposishonnan di Boy Dap ku a skor hopi haltu tabata e tumba “E Djaka”. Despues djei a kuminsá e trayekto di su éksitonan den Festivalnan di Tumba.

Por sierto ta bon pa menshoná ku Boy Dap tabata e último miembro di  e promé direktiva di AMAK ku a keda formá na aña 1968. Komo tal dia 12 di novèmber 1970, e tabata forma parti di e direktiva enkabesá pa Peng de Windt d.f.m. ku a bai negoshá ku Comitee di Carnaval 1971 bou di presidensia di Omario Merien d.f.m. pa e ritmo di tumba keda introdusí durante marchanan di karnaval.

Asina pues e promé Festival di Tumba ku a tuma lugá na 1971 den Theatro Roxy, Boy Dap  logra e titulo di Rei di Tumba ku e piesa “Bash’é”. Ta bon pa menshoná ku Boy Dap tabata intérprete i kompositor durante Festival d Tumba, ku a tuma lugá dia 31 di yanuari 1971.

Seguidamente nos ke menshoná  e demas éksitonan di Boy Dap durante Festival nan di Tumba.

Na 1973 Boy Dap a bira Rei di Tumba ku su komposishon “Dal e kos”

Na 1974 “Mand’é”

Na 1979 “Sigui awor”

Na 1981 “Tur hende kompañ’é”

Na 1983 “Un biaha mas”

Na 1985 “Despensa e ta bini”

Na 1988 Promé finalista “Zon’é pa mi bai su tras”

Na 1989 “Waya pasa bai”

Na 1989 Rei di Tumba di Ántes

Na 1990 Promé finalista “Hala bin hala den anim’é”

Na 1992 “Bòltu e blachi”

Na 1995 Promé finalista “Nos ta ban p’e”

Na 1997 “Klab’é”

Na 1999 Di 5 finalista “Bin tuma awe”

Na 2000 Amak a dediká Festival di Tumba na Anselmus Boy Dap

 

Boy Dap su influensia riba Festival di Tumba tabata notabel i ta pa e motibu ei hopi tumbero ta rekonosé ku  Boy Dap tabata un inovador.

Durante hinter su trayektoria, Boy Dap tabata sostené su organisashon AMAK, di kual e a forma parti di direktiva for di promé momentu.

Boy Dap tabata fungi tambe komo dosente den e proyekto di Formashon Musikal den Bario i tabata duna lès di perkushon i diferente di su alumnonan ta formadó parti di agrupashonnan musikal aktualmente.

Danki Dios Boy Dap a risibí diferente rekonosementu durante di su bida, no solamente di AMAK, pero di otro organisashonnan i ta fresku den nos memoria e konsierto ku a tuma lugá riba Plasa Brion organisá pa Fundashon Bon Intenshon i Banko Maduro, kaminda Pueblo di Kòrsou por a disfrutá di un kantidat grandi di komposishonnan di Boy Dap.

Mundu Farandulero, miembronan di AMAK i pueblo di Kòrsou en general, sigur lo bai sinti hopi falta di e talentoso músiko, kantante i outor, Anselmus Boy Dap, ku a laga un kantidat grandi di su obranan musikal atras pa pueblo di Kòrsou por sigui disfrutá di dje.

Direktiva di AMAK ta deseá hopi forsa na su señora Alys, na su yunan, nietunan, rumannan i demas famia ku e pèrdida sensibel aki. Nos ta sigur ku Boy Dap lo haña un puesto di honor den Reino Selestial

Ku su alma sosegá na pas.

 

Direktiva di  AMAK




 

Click here / Klik aki pa wak kuantu aktividat interesante e muchanan ta hasi https://www.facebook.com/Total-Care-Institute-454507071305043
Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: