Eksitoso Wega di Tur strea i Tryout:  RBI 2021 a sigui selebrá siman grandi di éksito di beisbòl di Kòrsou

Eksitoso Wega di Tur strea i Tryout:
RBI 2021 a sigui selebrá siman grandi di éksito di beisbòl di Kòrsou

WILLEMSTAD – Siman pasa tabata un siman di hubileo pa beisbòl di Kòrsou na momentu ku Ozzie Albies a logra gana e título máksimo di kampion mundial ku Atlanta Braves. Albies tambe den pasado a forma parti di RBI i p’esei ta importante pa organisashonnan di Little League i RBI sigui haña sosten pa sigui desaroyá e próksimo Ozzie Albies. Esei ta lokual a tuma lugá tambe e fin di siman tras di lomba ku fiesta di beisbòl, djasabra Ku Wega di Tur Strea i djadumingu tryout dilanti sigur un bon kantidat di scout lokal i internashonal. E fin di siman tras di lomba tambe a marka mitar di temporada RBI 2021 patrosiná pa Maduro & Curiel’s Bank. For di den siman a logra hunga e weganan ku a keda posponé pa motibu di áwaseru. Tabata un fin di siman eksitoso ku a konta ku presensia di scoutnan i representantenan lokal di organisashonnan di Liga Grandi i tambe vários scout internashonal ku tabata na Kòrsou pa e dos eventonan aki. Curaçao Baseball Development Foundation i Fundashon pa Nan ta sumamente satisfecho ku e grupo di hóbennan aki di 16 pa 18 aña a risibí e atenshon meresí den fin di siman tras di lomba.
Den e promé wega ku a keda reprogramá Firebrids Padres a gana di Marchena Braves ku skor di 6-3. Wilmer Bazur a resultá e picher ganador miéntras ku K-yon Adamus a bai di 3-3 pa Padres. Picher pèrdèdó a resultá Chelton Jones i Jahzeel Groetelaers a konektá e úniko hit pa Braves. Wild Cats/St. Michiel Dodgers a gana di Royal Scorpions Cardinals ku skor di 6-4. Picher ganador tabata Cleavon Lasten Greggson Juliana a bai di 2-1 pa Dodgers. Picher pèrdèdó tabata Jayverson Rellum i Jaydon Gosepa a bai di 3-2 pa Cardinals. E último wega ku a hunga pa kompletá promé buèlta di RBI 2021 a bai entre Sta. Rosa Indians i Suffisant Royals. Jamil Zalm a resultá e picher ganador pa Indians i mihó bate tabata Rodmar Angela bayendo di 3-2. Den e wega aki Indians a konektá tres tripel i un honron. Rodmar Angela; Qyshawn Legito; Nyzar Martins-Pereira ku tripel i Angela ku honron tambe.
E selebrashon di beisbòl a kontinuá djasabra ku Wega di Tur Strea ku partisipashon di 36 pelotero. Opviamente un ekipo tabata mas fuerte ganando e wega fásilmente ku skor di 10-1. For di den siman e dos coachnan, Coach Benita i Coach Hooi a skohe nan respektivo peloteronan pa forma kada un su ekipo. Tabata coach Hooi ku a gana ku su ekipo. Tantu Gensley Ryan i Aiden Kimmenaede ku a bai di 2-2 na bate i e picher Gyasi Isenia a resultá picher ganador. Maryelo Chirino a bai di 1-1 i Jaydon Gosepa a konektá honron de kousa pèrdí. Picher pèrdèdó tabata Keorden Leito.
Djadumingu un total di 25 hóben pelotero a hasi tryout dilanti e scoutnan presente demonstrando nan talento den vários aspekto di beisbòl. Scoutnan a haña un bon oportunidat pa evaluá e talentonan lokal i awor lo traha nan rapòrtnan kustumbrá.
Kampionato di RBI 2021 patrosiná pa MCB lo reanuda ku vários wega próksimo fin di siman kuminsando for di djabièrnè na Tio Daou Ballpark.