Dodgers i Padres ta sigui na kabes di RBI 2021 ku marka di 7-1

November 15, 2021 REDAKSHON

WILLEMSTAD – Fin di siman tras di lomba a marka inisio di e segundo i último buèlta di RBI 2021 patrosiná pa Maduro & Curiel’s Bank. Aparte di e weganan diario tabata un fin di siman speshal pa motibu ku porfin despues di un tardansa for di kontrol, Curaçao Baseball Development Foundation por a hasi entrega di kahanan di bala na tur organisashon partisipante. Ademas a hasi entrega ofisial di e kamisetanan di RBI ku ta karga nòmber di e ekiponan di Liga Grandi, logo di RBI i MCB. Tambe representante di MCB, Cora Sluis-Gibbs i Cindy Chong a bin presensia wega i e organisashon di e torneo, ekspresando nan satisfakshon di e forma ku tur kos ta bayendo. Miéntras tantu e dos ekiponan Wild Cats/St. Michiel Dodgers i Firebirds Padres ta sigui komandá e tabla di posishon ku rèkert igual di 7 gana i solamente 1 wega pèrdí.
Den promé wega djabièrnè atardi na Tio Daou Ballpark tabata e ekipo di Marchena Braves ku a gana fásilmente di Sta. Rosa Indians ku skor di 11-1. Picher ganador tabata Raydjen Rosina miéntras ku Thair Sambo a bai di 2-2 pa Braves. Picher pèrdèdó tabata Shurick Mouricia miéntras ku Allen Hollander a bai di 2-1 konektando un di e dos hitnan ku Indians tabatin e anochi aki. Djasabra mainta Firebirds Padres a gana Royal Scorpions Cardinals 8-1. Picher ganador tabata Michelson Felipa i mihó bate pa Padres tabata Wilmer Bazur di 2-2 di kual un honron. Pa Cardinals a pèrdè Steaven Amorsingh i David Schotborgh a bai di 1-1 na bate. Den di dos wega djasabra Wild Cats/St. Michiel Dodgers a gana fásilmente di Suffisant Royals ku skor di 15-1. Picher ganador tabata Nathan Isenia i Nahiem Mutueel a bai di 2-2 pa Dodgers. Picher pèrdèdó tabata Vienerick Francisca i Maeverson Francisca a konektá e úniko hit pa Royals. Finalmente riba e dia aki Marchena Braves tambe ku skor grandi riba Groot Kwartier Astros 17-6. Picher ganador tabata Leivendrick Meulens. Na bate tabata Joshua Leito i Tha-Vish Doran ku a bai di 4-2 pa Braves. Picher pèrdèdó tabata Terrence Seintje i Najearlon Reinillia a bai di 3-3. Djadumingu tambe tabatin tres wega interesante na Tio Daou Ballpark i den promé wega Sta. Rosa Indians a gana di Suffisant Royals 15-6. Picher ganador tabata Jaedon Colina miéntras ku Jamil Zalm I Rodmar Angela a bai di 3-2 na bate pa Indians. Picher pèrdèdó tabata Alexys Snel. Na bate pa Royals tabata Kevin Overman i Maeverson Francisca a konektá e úniko dos hit di nan ekipo. Despues Firebirds Padres a gana Groot Kwartier Astros 10-4. Picher ganador tabata Eddyson Jobs I e mes a bai di 3-2 na bate pa Padres. Picher pèrdèdó tabata Tristan Calmes i David Raap a bai di 1-1. Den último wega di wikènt Wild Cats/St. Michiel Dodgers a gana di Royal Scorpions Cardinals ku skor di 12-1. Picher ganador tabata Cleavon Lasten i Nahiem Mutueel a bai di 3-3 pa Dodgers. Picher pèrdèdó tabata Wenevon Apostel i Jayverson Rellum a bai di 1-1 pa Cardinals.
Kampionato di RBI 2021 patrosiná pa MCB lo kontinuá ku vários wega próksimo fin di siman kuminsando for di djabièrnè na Tio Daou Ballpark. Weganan di RBI Curaçao 2021 por keda sigui di forma digital via iScore i tambe semper por bishita e website http://www.rbicuracao.com, unda por haña tur informashon i resultadonan. RBI Curaçao tin su propio twitter account tambe bou di @CuracaoRbi i ya manera sa kaba tin e página riba Facebook.