PROMÉ MINISTER GILMAR PISAS A RISIBÍ REPRESENTANTE DI IOM (INTERNATIONAL ORGANIZATION FOR MIGRATION).

PROMÉ MINISTER GILMAR PISAS A RISIBÍ REPRESENTANTE DI IOM (INTERNATIONAL ORGANIZATION FOR MIGRATION).

 

Willemstad – Promé Minister Gilmar Pisas a risibí sr. Robert Natiello, kordinadó regional i hefe di mishon di IOM (International Organization for Migration) dia 17 di novèmber 2021.

 

Sr. Robert Natiello i su tim a bin hasi un bishita di kortesia serka Promé Minister.

Durante di e kombersashon a toka e tema pa ku e trabounan ku IOM ta hasi i di ki forma nan ta dispuesto pa duna Kòrsou sosten riba e área di entre otro maneho di Migrashon i trafikashon di hende.

 

Durante di sr. Robert Natiello su estadia aki na Kòrsou IOM a organisá un training ku a dura 3 dia tokante e tópiko di protekshon di viktimanan di trafikashon di hende.

 

IOM ta un organisashon intergubernamental líder den e área di Migrashon. E la keda fundá na aña 1951. E organisashon ta traha estrechamente den kolaborashon ku sosionan gubernamental, intergubernamental i no gubernamental.

IOM huntu ku su sosionan ta traha pa yuda garantisá órden i humanidat pa ku  asuntunan di migrashon, promové e koperashon internashonal riba asuntunan di migrashon, yuda buska solushon práktiko pa ku desafionan migratorio i e prestashon di asistensia humanitario pa ku e nesesidat di migrantenan.

 

IOM ta brinda servisio na 172 miembro di estado, 8 estado adishonal ku un status di opservadó ku ofisina den mas di 100 pais i ta asesorá Gobiernunan i migrantenan a trabes di aktvidatnan ku ta inkluí e.o. promoshon di e derecho migratorio internashonal, e salu di migrantenan i e dimenshon di genero di migrashon.

 

Na final di e kombersashon a entregá na Promé Minister un dokumento di IOM riba e parti di un “Behoefteanalyse van Migratiebeheer” ku nan a produsí e aña.