Entrante djaluna 5 di febrüari 2024 servisio di THZ/ GMN ta reanudá su servisionan di kùrmentu

Entrante djaluna 5 di febrüari 2024 servisio di THZ/ GMN ta reanudá su servisionan di kùrmentu

Willemstad –  Departamentu di Higiena (THZ) di Ministerio di Salubridat, Medio Ambiente i Naturalesa (GMN) ta informá ku entrante djamars 6 di febrüari 2024 ta reanudá ku kùrmentu di personanan ku ta atendé ku benta di kuminda i kos di bebe pa públiko. E proseso di kùrmentu a keda temporalmente suspendé riba 30 novèmber 2023 pa motibu di retonan di alokashon na edifisionan na Zakitó. Durante e renobashon di e edifisio na Colon pa aloká e personal, nos a haña algun reto tékniko ku a tuma algun tempu pa solushoná esakinan. Awor e lokalidat ta kla, i por a muda e personal di THZ pa e edifisio di Colon na Otrabanda.

 

THZ ta kla pa duna servisio optimal na su klientenan.

 

Pa por sigui protehá salú di siudadanonan optimalmente i baha e rísiko riba malesanan di infekshon gastro- intestinal, GMN ta reanudá kùrmentu di tur foodhandlers manera menshoná.

 

Ta importante pa menshoná ku no a detektá brote di malesa gastro- intestinal den komunidat di Kòrsou durante e temporada di suspenshon. E intenshon di e eksámen di foodhandlers ta pa determiná ku e foodhandler konosé e reglanan di higiena i asina baha e riesgo di infekshon. E akto di laba man ta i ta keda e akto mas importante pa tur persona ku ta hèndel ku kuminda i ta konta sigur pa tur foodhandlers.

 

E proseso di kùr ta enserá lo siguiente; mester pasa un eksámen ku ta dura 25 minüt.  Pa por pasa eksámen, e kliente ta skohé e manual digital. Ta hasi esaki dor di tik den web search-GOOGLE  “bukinan di higiena” kaba e idioma di bo preferensia na sea papiamentu, hulandes, ingles, spañó òf chines.
Mester bin ku:

• Identifikashon bálido sea reibeweis, sédula òf pasport,
• Un pasfoto resien,
• Karchi di ATM pa swaip (NO TA TUMA SEN KÈSH). E kosto ta Nafl. 50,-.

 

Èksamen ta tuma lugá dirèkt despues di registrashon.

 

Dianan :    Djaluna, djamars, djárason i djaweps. 

Lugá    :    GMN na Colon Otrobanda riba e segundo piso.

Orario :    8:00 a.m. pa 11:00 a.m. i mèrdia di 2:00 p.m. pa 3:30 p.m.

 

NO MESTER DI TRAHA AFSPRAAK !

Tuma bon nota!
GMN a duna karta di eksonerashon pa kùrmentu for di inisio di desèmber 2023, pa motibu ku a suspendé kùrmentu temporalmente. Esaki ta nifiká, ku durante kontròlnan di GMN, no ta kontrolá e karchi di kùr. Pa awor, e periodo di eksonerashon ta keda bálido te próksimo aviso di parti di GMN. Nos ta urgi tur persona pa bai hasi e kùrmentu mas rápido posibel, komo ku pronto GMN lo avisa e fecha entrante ku tur hende ku ta atendé ku kuminda i bebida mester di un karchi di kùr bálido di GMN.

*Tuma nota!
E sitio ta un lokalidat nobo ku ta situá na e di dos piso den e kompleho kaminda ántes tabata Colon Shopping Center i kaminda tabata Cambes.

Mester tene kuenta ku si no por stashoná fásil dilanti e edifisio, por hasi esaki den serkania di Colon.

 

_____________________________

Drs. Melissa Arias

Hefe di G&Gz

5 di febrüari 2024