Elsa Rozendal, lider Democraat: Gabinete Pisas ta nabegando sin rumbo
Elsa Rozendal, lider Democraat: Gabinete Pisas ta nabegando sin rumbo
Willemstad— For di dia ku Gabinete Pisas a sinta, Kòrsou ta wòrdu goberná estilo di ‘dia pa dia’ i segun e koriente ta hibé. Esaki ta sumamente iresponsabel i peligroso
Gabinete Pisas ta hasi mas ku 5 luna ku nan ta sintá i te dia di awe no a presentá un Programa di Gobernashon pa komunidat sa kiko ta e Gobièrnu su vishon i kosnan ku e ke logra pa nos pais.
Segun e lider di Democraat, señora Elsa Rozendal, ta a base di e Programa di Gobernashon, komunidat por evaluá si e Gobièrnu realmente ta kumpli ku loke e a primintí.
Awor aki ta tur dia komunidat mester tuma nota di deklarashonan i akshonnan di sierto ministernan sin sa kiko ta e konsekuensinan i na unda esakinan ta hiba nos komunidat i nos pais. Akshonnan i deklarashonnan ku te asta ta mina nos demokrasia.
Nos pais ta den un estado di krisis ketu bai i esaki ta rekerí un gobernashon responsabel.
Ta bin aserka ku te ainda nos no tin un minister di Hustisia pa enkargá su mes shen porsiento na e kartera di hustisia pa atendé ku e krimen ku ta asotando nos pais. Atrako i ladronisia di outo ketu bai ta al orden di dia sin ku komunidat sa kiko e Gobièrnu ta bai hasi na e problemátikonan aki.
Rozendal ta spera di Gabinete Pisas, ku a primintí komunidat ku e lo goberná pa pueblo, huntu ku pueblo i ku ta pueblo su bùrt, pa mustra mas seriedat i presentá su Programa di Gobernashon proksimamente. Sino aweró ta kon pueblo por hasi un evalushon si Gabinete Pisas a kumpli ku su palabra si òf no!

