Partido Democraat prekupá ku intervenshon kontra di lei di Minister pa benefisiá amigunan.
Partido Democraat prekupá ku intervenshon kontra di lei di Minister pa benefisiá amigunan.
Ku tur prueba nesesario a keda demostrá ku Minister di Salubridat (MFK) a intervení pa benefisiá esnan responsabel pa mal maneho na BZV.
Minister Dorothy Pietersz-Janga formalmente a manda un karta pa esnan ku ta hasi nan esfuerso pa kobra fondo nan di BZV ( sèn di pueblo) ku a disparsé i instruí nan pa para e proseso di kobro pa kua inkluso tin veredikto di korte kaba.
E akshon di minister ta kontra di lei i inkluso kastigabel penalmente, komo ku e ta instruí esnan ku ta responsabel pa no hasi nan trabou i kobra e suma nan ku ta laba den miones ( 6 mion ) di florin ku ta pertenesé na fondonan públiko. No solamente ku minister no ta outorisá, esei ta robes kaba, pero e intervenshon tin komo konsekuensia direkto ku ta perhudiká pueblo di Kòrsou pa miones , faboresiendo esnan responsabel pa e desaparishon di e fondonan. Esaki por keda konsider káomo un akto ilegal i kastigabel pa lei, komo ku e ta kontra di interés di BZV i pueblo di Kòrsou. Di otro banda e ta benefisiá esnan responsabel pa desaparishon di e fond nan direktamente.
Siguiente día después ku e asuntu a bira públiko, Minister ta bini ku un komunikado pa purba duna otro buelta na su akshon. Pero for di e mes un komunikado por dedusí ku Minister no tin intenshon pa stòp di trata pa stroba e trabou di e ‘vereffenaar’ nan.
Partido Democraat ta gradesí esnan ku a ta enkargá ku e fundashon pa a sali na vanguardia di interes di nos pueblo for di momento ku nan a entamá e proseso pa kobra. Pero mas ainda ku nan no a permití Minister Pietersz-Janga su intenshonnan inkorekto. Esaki no ta trata solamente un asuntu di separashon di poder. Ku òf sin separashon di poder un instrukshon asina ta ilisito.
Nos kier pidi Parlamento i hinter pueblo di Kòrsou pa sostené e ‘vereffenaar’ nan pa nan por sigui hasi nan trabou i no laga intenshonnan robes stroba esaki.
No solamente ku Minister a kometé un akto ilísito i pa kua e mester saka su konklushon i retirá. Pero nos no ta mira ainda ku e 21 parlamentarionan ku resientemente a keda skohé i a risibí e mandato di pueblo pa representá pueblo, ta tuma e asuntu na serio i ta pidi un reunión públiko pa atendé ku e minister. Ta solamente si e minister mes tuma su retiru di inmediato Parlamentu lo tin e opshon pa no pidi su retiro a base di un moshon di deskonfiansa.
Nos demokrasia asina aki ta kore peliger. E manera ku e akto aki a tuma luga i ku e pruebanan riba mesa esaki ya kaba ta motibu pa Ministerio Públiko a akshoná, analisá e kaso i atendé ku e minister.
Pues e retiro boluntario di e minister ta e mihó kos pa tuma luga después di e akto ku el a kometé, e di dos ta un moshon di deskonfiansa sostené pa 21 miembro di parlamentu i e di tres ta akshon di Ministerio Públiko.
Den kaso ku minister mes tuma su retiro tin un asina yamá aseptashon di responsabilidat pa kua kisas Ministerio Públiko no tin nodi di pidi kastigu. Den kaso ku e moshon no risbí 21 voto esei ta nifiká ku tin miembro di Parlamento ku ta sostené intervenshon ilísito. Pues esei ta kumbini tur hende i ta respetá nos sistema demokrátiko.
Nos ta spera tambe ku Ministerio Públiko ta tuma akshon basá riba nan outoridat outánomo pa investigá e malversashon.
Konkluyendo, ta rekomendabel pa Minister tene honor na su mes i tuma su retiro, Por sierto esnan mas yegá na Minister, esta e partido na kua e ta afiliá, MFK, mes a distansiá kaba for di akshonan di e minister.
Partido Dermocraat ta prekupá ku e rumbo anti demokrátiko ku ta desaroyando kaminda Gobièrnu, pero mas aun nos parlamentarionan, no ta hasi nan trabou i ta permití e tipo di akto nan aki pasa komo si fuera ta kos chikí.
Mientras den Parlamentu tin abogadonan penal tantu den koalishon komo oposishon ku sa bon bon de ke se trata.
Partido democraat ta pidi hinter pueblo di Kòrsou pa vigilá e proseso aki i wak si e parlamentu ta tuma nan responsabilidat pa salbaguardia nos interés komo país na serio.
