Ku bentaha pa kompanianan di Kòrsou i Karibe TROPICSHOPPING.COM DI CURINDE TA HASIE POSIBEL PA KOMPANIANAN ATRAE KLIENTENAN DANKI NA NAN APORTE KORPORATIVO

Ku bentaha pa kompanianan di Kòrsou i Karibe

TROPICSHOPPING.COM DI CURINDE TA HASIE POSIBEL PA KOMPANIANAN
ATRAE KLIENTENAN DANKI NA NAN APORTE KORPORATIVO

Willemstad 28 di novèmber 2021- Curaçao Industrial and International Trade Development Company (Curinde) un biaha mas ta dal un paso inovativo dor di krea e posibilidat pa kompanianan ku ta hasi uso di su plataforma di merkadeo i benta elektróniko, tropicshopping.com, kontribuí diréktamente na e kousa korporativo di nan gusto ora ku klientenan kumpra via di e plataforma.  Esaki, danki na un aliansa ku Sparo, kual ta un Microsoft pa asina yamá ‘start-up companies’, di Maryland na Merka.  Klientenan ta duna balor haltu i ta skohe pa servisio i produkto di kompanianan ku ta transparente tokante nan kontribushon korporativo.  

E solushon awor ta hasi’é posibel pa kompanianan ku ta brinda nan produkto via di tropicshopping.com fasilitá na kumpradónan un sierto preferensha pa un kousa, na momentu ku nan kumpra produktonan i kontribuí na un kousa di nan eskoho.  Esaki ta un bentaha stratégiko úniko pa produktonan di orígen karibense penetrá riba e merkado mundial kresiente di e-commerce.

 

Jacqueline Jansen, CEO di Curinde, a bisa “Nos ta kontentu di por tin Sparo komo partner pa krea un resultado win-win pa kompanianan chikí i mediano na Kòrsou i den Karibe.  E aliansa ku Sparo lo habri e posibilidat pa mas desaroyo ekonómiko pa Kòrsou, dor di hasi nos mas aksesibel den e eko-sistema di e-commerce na Merka i mas aleu den mundu, pa medio di  tropicshopping.com.”

Sra. Jansen a sigui bisa ku esaki ta un logro importante despues ku Curinde i Curaçao Investment and Promotion (CINEX) a firma un akuerdo di intenshon.

 

Curinde na Mart di e aña aki a lansa www.tropicshopping.com den aliansa ku e kompania merikano P3 Capital.  Aktualmente tin 394 kompania registrá riba e plataforma, prosedente di varios pais. Tin kompanianan di entre otro Kòrsou mes, Aruba, Merka, Australia, Bahamas,  Canada, Trinidad i mas.

E plataforma ta brinda oportunidat na mundu pa kumpra produktonan for di entre otro Kòrsou i Karibe ku un vishon pa krea mas trabou pa habitantenan den Karibe, dor di propagá e plataforma di benta aki den ekonomia global. Di e forma aki Curinde por probechá tambe di e merkado kresiente di e-commerce i tin un partisipashon aktivo riba  e merkado kresiente di e-commerce ku tin mas di US$ 1.2 trillion na transakshon di kompra i benta.

  

Ku inkorporamentu di Sparo su solushon di responsabilidat sosial korporativo (CSR) den Tropic Shopping su portfolio di inovashon di e-commerce ta hasi’é posibel pa kompanianan di Kòrsou i di Karibe atraé klientenan komprometé na un kousa i na mes momentu tin un impakto positivo riba bienestar kolektivo.

Curinde ta gradisí tur partner pa nan apoyo i muy en espesial palbaranan di gratitut ta bai na Ministerio di Desaroyo Ekonómiko i CINEX.