PROMÉ MINISTER GILMAR PISAS A HIBA PALABRA I HASI APERTURA DI DABBOUSSI MOTORS

PROMÉ MINISTER GILMAR PISAS A HIBA PALABRA I HASI  APERTURA DI DABBOUSSI MOTORS.

 

Willemstad – Promé Minister Gilmar Pisas a hiba palabra i hasi apertura di Daboussi Motors dia 27 di novèmber 2021.

Na e apertura aki tabatin presente Minister di Desaroyo Sosial, Labor i Bienestar Ruthmilda Larmonie-Cecilia, Minister di Desaroyo Ekonómiko Ruiandro Cijntje i Minister di Finansa Javier Servania.

 

Daboussi Motors ta un agensia di outo ku ta ofresé e marka di outo Changan, un marka “state owned” di China. E propetario ta un yu di tera.

Aki na Kòrsou e marka aki ta nobo, pero e marka ya ta riba merkado  pa mas ku 150 aña rònt mundo.

E ta un marka di outo full ekipá, ku ta ofresé 5 aña di garantía i ku prijs nan hopi mas abou. Esaki ta di aploudí, ya asina nos hendenan por yega mas fásil na un outo nobo.

 

E Gobièrnu aktual a bini ta demostrá ku e ta duna honor, rèspèt i rekonosementu na tur hende ku ta sigui kere den Kòrsou, sigui invertí den Kòrsou i aportá na nos ekonomia.

Aki ta trata di un grupo ku no a dependé di fondo di Gobièrnu pa start un agensia di outo i ku ya a bende alrededor di 30 outo den apenas 2 luna.

Durante di e anochi a hasi donashon na diferente instansia for di nos komunidat.

 

Ora un hende òf grupo invertí den Kòrsou esaki ta nifiká ku nos ekonomia ta kuminsá move i ku kosnan ta bai sigui move den un bon direkshon.

Un di e metanan kardinal di e Gobièrnu aktual ta pa e ekonomia move i krese.

Ora esaki tuma lugá lo krea mas oportunidat di trabou pa mas yu di tera, loke tambe ta un punto stratégiko di e Gobièrnu aktual.

Mas yu di tera por tin un entrada ku lo yuda nos hendenan pa por hiba un bida na un nivel mas akseptabel i tin e posibilidat pa por yega na tur loke nan ta deseá den un forma hustu.

 

Pues tur ku ta aportá na nos ekonomia i òf yuda e Gobièrnu aktual pa e por logra tur e kuater puntonan stratégiko kuta keda deskribí den e Akuerdo di Gobernashon,  por konta ku presensia, sosten moral i kualkier pèrmit ku tin mester pa por sigui invertí den nos Pais.

 

E ministernan di e Gobièrnu aktual lo sigui hasi tambe tur esfuerso pa ta presente na tur apertura di kualkier proyekto i òf negoshi nobo, kòrta tur sinta ku mester kòrta tur kaminda na e aperturanan aki, debí ku aki ta trata di hendenan ku ainda ta kere den nos País i ku ainda ke sigui invertí i aportá na un kresementu positivo di nos ekonomia.

 

Promé Minister a ekspresá gratitut i felisitashon na nòmber di Gobièrnu di Kòrsou i a ekspresá di ta sumamente kontentu di mira e tipo di desaroyonan positivo aki i di sa ku ainda tin hende ku ta tuma riesgo na benefisio di nos komunidat.

 

 

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: