Partido Democraat ta kumpli 77 aña di eksistensia

 

Partido Democraat ta kumpli 77 aña di eksistensia

Selebrando nos di 77 aniversario, Democraat ta para ketu i gradisí tur nos fiel miembronan pa e sosten inkondishonal i komunidat kompletu pa e apoyo durante añanan tras di lomba. Nos a sa di mantené nos base di krachinan i sigui ku e lucha ku nos fundadónan a planta komo simia. 

Partido Democraat ta e partido eksistente mas bieu na Kòrsou. Democraat a keda fundá riba 8 di desèmber 1944 pa entre otro ko-fundadó señor Ifrain Jonckheer i señores Kroon, Isa, de Regt, van Manen, Cohen, Henriquez, Kibbelaar, Rosario i Comvalis. 

E lucha di Partido Democraat pa nos hendenan tin seguro sosial, bibienda, un penshun, sueldo minímo, ta algun di e logronan fundamental ku te dia di awe ta vigente den nos komumidat i nos pais. 

Partido Democraat ta un partido riku na logronan fundamental pero tambe tin varios organisashon interno manera ISED, pa forma polítikonanan i e ala femenino, ADEFA, ku mediante diferente ehersisio, a yuda forma e famia grandi di Partido Democraat. 

Banda di hustisia sosial, Partido Democraat ta para pa igualdat, Libertad, Responsabilidat i Toleransha, sinku pilar fundamental. Den nos aktividatnan diario nos ta boga pa opinionnan moderno, inovativo i ophetivo atraves di balor i normanan demokrátiko. Nos ta promové interkambio liber di ideanan polítiko ku e meta pa stimulá pueblo pa ehersé nan derecho di yuda stipulá òf influensiá nan propio futuro, di nan famia, nan bario i nan pais.

Democraat ke pa pueblo di Kòrsou sinti un adelanto berdadero i nos ta sigui duna nos aporte pa e transformashon di Kòrsou tuma lugá na bienestar di nos komunidat.