CBCS lo enkabesá esfuersonan koordiná den Karibe riba impakto di riesgo klimátiko pa sektor finansiero

 

 

CBCS lo enkabesá esfuersonan koordiná den Karibe riba impakto di riesgo klimátiko pa sektor finansiero

WILLEMSTAD/PHILIPSBURG – Ora toka e tema di kambio klimátiko, kasi semper esei tin di aber
ku su impakto riba nivel di laman, oumento di temperatura, pèrdida di biodiversidat i kambio den
naturalesa. Sin embargo, kambio klimátiko tin su impakto riba ekonomia i sektor finansiero tambe. E
peligernan ku kambio klimátiko ta trese kuné ta afektá e sistema finansiero mundial. Por ehèmpel,
sierto invershon ku banko a finansiá por kore riesgo ligá na klima. Di otro banda, via green financing
(‘finansiamentu bèrdè’), e bankonan por fasilitá e proseso di transishon mundial pa teknologia ku ta
mihó pa medioambiente. Fuera di esei, ora di kalkulá nan primanan, kisas sektor di seguro mester tene
kuenta ku e pèrdidanan ku kambio klimátiko por trese kuné den futuro. Ku esei na mente, Centrale
Bank van Curaçao en Sint Maarten (CBCS) ta rekomendá sektor finansiero i demas institutonan
fuertemente pa, na un manera (pro)aktivo, integrá mekanismo den nan kuadronan di kontrol interno
pa redusí e riesgonan ligá na kambio klimátiko i asina bira mas resistente pa riesgo relashoná ku klima.
No opstante e variedat di metodologia ku ta siendo usá i desaroyá aktualmente, debí ku kambio
klimátiko ta un desaroyo impredesibel i di término largu, e proseso di identifiká i kalkulá e riesgonan i
posibel pèrdidanan ta keda un reto. No opstante, CBCS ta kontentu di por traha riba e tereno akí
komo presidente di e grupo di trabou pa riesgo klimátiko di Caribbean Group of Banking Supervisors
(CGBS), ku ta konta ku partisipashon di Trinidad & Tobago, Surnam, Jamaica i Guyana. ‘Ta via
kolaborashon so nos lo logra identifiká e fórmula adekuá pa fomentá green financing i manehá riesgo
klimátiko den nos region.’, segun Presidente di CBCS Richard Doornbosch.
Durante un foro virtual di CGBS riba e tópiko di riesgo klimátiko i green financing titulá ‘Integrating
Climate-Related and Environmental Risk into Prudential Supervision, CBCS a afirmá su kompromiso
pa dirigí e grupo di trabou den 2022. ‘Sektor finansiero di Karibe mester por antisipá, prepará i atendé
ku e peligernan ligá na kambio klimátiko. Tormenta tropikal Tomas di 2010 na Kòrsou i e orkannan
Irma i Maria di 2017 na Sint Maarten ta mustra e impakto ku fenómeno meteorológiko ekstremo i di
gran intensidat tabatin i lo sigui tin riba e institutonan finansiero, komunidatnan i ekologianan di nos
region. Nos mester ta prepará pa (huntu) nos por enfrentá esakinan (den sentido finansiero)’,
Doornbosch a konkluí.
CBCS ta kontentu di por traha pa fomentá e diálogo lokal i regional tokante riesgo klimátiko ku
diferente stakeholder i otro institutonan di supervision, i hisa e nivel di konsientisashon riba e tópiko
asina urgente akí.
Willemstad, 7 di desèmber 2021
CENTRALE BANK VAN CURAÇAO EN SINT MAARTEN

PB2021-034 CBCS to lead coordinated work in the Caribbean region on the impact of climate risks on the financial sector EN

PB2021-034 CBCS to lead coordinated work in the Caribbean region on the impact of climate risks on the financial sector NL

PB2021-034 CBCS to lead coordinated work in the Caribbean region on the impact of climate risks on the financial sector PA

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: