Impuesto nobo pa turista ta mehorá kobransa

Impuesto nobo pa turista ta mehorá kobransa

12/21/2021

KRALENDIJK BONAIRE: Kolegio Ehekutivo di Boneiru a proponé un ordenansa den konsepto pa un impuesto nobo pa turista.

Kolegio Ehekutivo di Boneiru a proponé un ordenansa den konsepto pa un impuesto nobo pa turista. A manda esaki pa Konseho Insular pa keda tratá. Mirando ku den komunidat tin pregunta, gobièrno di Boneiru ke informá kon leu ta ku e ordenansa nobo. No ta bai alkansá pa introdusí e impuesto di turista nobo pa 1e di yanüari 2022. Ta trahando pa e ordenansa nobo por bai na vigor pa fin di promé kwartal di 2022.

Sistema nobo

A skohe pa proponé un sistema nobo di impuesto pa turista, pa motibu ku e aktual sistema no ta funshoná manera debe ser. Na e momentunan akí ta logra kobra solamente 50 porshento mas òf menos di impuesto pa turista. Pa e motibu akí gobièrnu di Boneiru ta pèrdè algun mion na entrada pa aña.

Pa algun aña kaba gobièrno di Boneiru, huntu ku sektor turístiko di nos isla, ta hasiendo esfuerso pa yega na un impuesto pa turista nobo. Ku e ordenansa nobo ta proponé pa kobra kada no-residente e impuesto pa turista un bia pa aña, i ta motivá e bishitante pa paga adelantá online. Tin posibilidat tambe pa paga na aeropuerto ora yega Boneiru. E tarifa proponé ta $ 50 pa persona pa aña. Pa e islanan di èks Antia Hulandes ta proponé un tarifa mas abou, esta di $10 pa persona pa aña. Studiantenan boneriano ku ta studia pafó di e isla no mester paga e impuesto di turista.

Ku e entrada ku ta generá ku e impuesto akí, gobièrnu por inbertí pa drecha kalidat i durabilidat di nos infrastruktura i di e produkto turístiko di Boneiru. Na promé lugá esaki ta benefisia tur siudadano di Boneiru. Pa e empresario den e sektor i e turista tambe e ta krea mas fasilidat i un eksperensia mas agradabel. Por inbertí e entradanan aki tambe pa promové nos kultura i asina posishoná Boneiru komo un isla outéntiko i úniko. Un meta importante pakiko mester generá mas entrada ta, ku por inbertí mas den entrenamentu i kurso pa nos hendenan, pa krea mas oportunidat pa hende lokal por gana un bon entrada di turismo.

Na promé instante tabata intenshon pa e impuesto nobo pa turista drenta na vigor entrante promé di yanüari 2022 pa turistanan ku ta hospedá. Sinembargo, a resultá ku e fecha akí no ta alkansabel.

Turismo krusero

E ordenansa den konsepto ku a keda mandá pa Konseho Insular, ta proponé un subida di e impuesto pa  turista ku yega ku barku krusero.

Boneiru tin bon kontakto ku e kompanianan di krusero grandi. Resientemente a tene kòmbersashon ameno ku e kompanianan akí, i gran mayoria a duna di konosé ku nan ta sostené e oumentu proponé. Nan tambe ta mira ku mester di e entrada pa por inbertí den mehorashon di nos fasilidatnan. Ademas, nan ta indiká ku a duna nan sufisiente tempu pa inkluí e kambio den nan paketenan ku nan ta ofresé.

Proseso

Kolegio Ehekutivo a presentá e konsepto di ordenansa pa un impuesto pa turista nobo na Konseho Insular. A disidí despues ku lo agregá un amienda. Konseho Insular lo trata e tópiko aki den e aña nobo. Ta hasi esfuerso pa introdusí e impuesto pa turista nobo promé ku fin di e promé kwartal di 2022.

This site uses Akismet to reduce spam. Learn how your comment data is processed.

%d bloggers like this: