TEMPU DI ESPERA UN TIKI MAS LARGU PA MOTIBU DI INTERES HOPI GRANDI PA ANGUA DI BUSTER

 

TEMPU DI ESPERA UN TIKI MAS LARGU PA MOTIBU DI INTERES HOPI GRANDI PA ANGUA DI BUSTER
21 desèmber 2021
KRALENDIJK BONAIRE: Awor ku personanan riba 18 aña por pasa e angua di buster, tin un oumento enorme di registrashon pa e angua akí. E departamento di Salubridat Públiko ta kontentu ku esaki. Pa motibu di e interes grandi pa e angua akí, siudadanonan mester tene kuenta si ku tempu di espera ta un tiki mas largu ku normal. E number grátis 0800 0900 pa traha sita pa e angua di buster ta hopi okupá. I na e sentro di pasa angua na Kompleho Deportivo Jorge Nicolaas tambe, e tempunan di espera por oumentá algu mas ku normal.

Fin di siman pasá a anunsiá kondishonnan di biahe mas severo pa bini Boneiru for di paisnan di riesgo haltu i hopi haltu. E medidanan akí mester retrasá binimentu di e variante di omikròn na Boneiru. Mes momento ku e anunsio akí, a hasi un yamada tambe na siudadanonan pa pasa e angua di buster. A hasi un yamada tambe na siudadanonan ku no a pasa e promé òf e di dos angua di corona, pa pasa e angua akí.

Salubridat Públiko ta spera di evitá asina ku e preshon riba hòspital i sobrá di kuido ta oumentá na momentu ku e variante di omikròn yega Boneiru. Djaluna a bira konosí ku Aruba tin 17 kaso di kontagio awor ku e variante di omikròn. E variante di omikròn no a yega Boneiru ainda. Pero ekspertonan ta tene kuenta ku kualke momento e variante ta aparesé na Boneiru tambe.

Bo no a pasa e promé òf di dos angua di corona ainda? Yama 0800 0900 pa traha un sita. Bo a pasa e dos anguanan di corona si i e angua di buster ainda nò? Yama 0800 0900 pa traha un sita pa pasa angua. Den luna di desèmber a planea dia èkstra riba kua siudadanonan por pasa e angua di corona i e angua di buster. Pa un bista di e dianan http://www.bonairecrisis.com

Share this page to Telegram

This site uses Akismet to reduce spam. Learn how your comment data is processed.

%d bloggers like this: