PROMÉ “TROMBONE CHALLENGE 2021” KU 23 TROMBONISTA A RESULTA UN EKSITO

 

PROMÉ “TROMBONE CHALLENGE 2021” KU 23 TROMBONISTA A RESULTA UN EKSITO

WILLEMSTAD – E tan antisipá “Trombone Challenge 2021” ku a tuma lugá djaweps dia 23 di desèmber último, a resultá un éksito total. No ménos ku 23 trombonista a partisipá na e evento aki, kaminda aparte di a toka dos kansion di Pasku, nan a interpretá e kansion “Way back then” ku tabata un piesa di e famoso pelíkula riba Netflix The Squid Games.

Durante 5 siman largu bou di direkshon di Hector Sampson, tur djadumingu e trombonistanan ku boluntariamente a registrá nan mes, a ensayá pa por a partisipá na e chèlinch aki. Ta trata aki di Trombonistanan ku sea ya ta tokando kaba den agrupashonnan popular, komo esnan ku  tin nan instrumènt ya pa hopi tempu pero nunka a sa di desaroyá riba esaki.

Poko poko pero sigur, Hector Sampson a sa di guia nan pa e chèlinch aki, pero na e mes un momentu a duna nan teps kon ta sigui desaroyá riba nan instrumento.

Durante e evento ku a tuma lugá den Conference Room na Sambil, e 22 Trombonistanan bou di direkshon di Hector Sampson a interpretá e kansionnan tremendo i a perkurá pa bon reakshon.

Un danki ta bai na AMAK, WESU, Sambil, Leo Sound i tambe T Experience ku a perkurá pa e aktividat por a bira un realidat, sin lubidá e trombonistanan mes ku a duna di nan parti. Un danki spesial na Dun Pieternella.

Ta e intenshon pa traha riba tantu un “Trumpet Challenge” komo un “Saxophone Challenge” den 2022 aki, pero tur kos ta dependé kon e reakshon di e trompetista i e saksofonistanan ta. Pa loke ta Trombone Challenge 2022, esaki lo ta mas grandi ku 2021. Di nos parti, un felis kambio di aña na Pueblo di Kòrsou i ku 2022 lo bira un aña di hopi músika i alegria.

 

This site uses Akismet to reduce spam. Learn how your comment data is processed.

%d bloggers like this: