Aunke e défisitnan ta bahando Debe di gobièrnu ta sigui oumentá

 

Aunke e défisitnan ta bahando
Debe di gobièrnu ta sigui oumentá

WILLEMSTAD/PHILIPSBURG – ‘Gobièrnu di Kòrsou i di Sint Maarten a registrá défisit mas abou
riba nan presupuesto di servisio ordinario na 2021, kompará ku 2020,’ asina presidente di Centrale Bank van Curaçao en Sint Maarten (CBCS), Richard Doornbosch, ta deklará den e di dos Boletin Trimestral di 2021, publiká pa Banko Sentral. ‘Na mes momento, e kuota di debe a sigui subi den transkurso di 2021 i a yega 90,0% na Kòrsou i 62,0% na Sint Maarten. Pa 2022 tambe ta proyektá un défisit presupuestario haltu pa tur dos pais, aunke mas abou ku na 2021,’ Doornbosch ta sigui bisa.
En bista di e krísis ekonómiko profundo kousá pa e pandemia di COVID-19 i su reperkushonnan riba
finansa públiko, Konseho di Minister di Reino a duna aprobashon pa Kòrsou i Sint Maarten desviá
for di Artíkulo 15 di Rijkswet financieel toezicht Curaçao en Sint Maarten, meskos ku tabata e kaso
na 2020. E artíkulo akí ta stipulá ku presupuesto di servisio ordinario di e gobièrnunan akí mester ta
balansá. ‘Na tur dos pais, défisit riba presupuesto di servisio ordinario a baha na 2021 kompará ku
2020. Esei ta danki na un bahada den gastu di gobièrnu, inkluso gastu relashoná ku COVID-19,
moderá pa un bahada den entrada, partikularmente entrada di impuesto’, Doornbosch ta splika.
Na tur dos pais, e oumento di kuota di debe públiko tabata debí na un oumento den e komponente
di debe eksterno. ‘Na 2021, Kòrsou i Sint Maarten a bolbe risibí sosten di likides di gobièrnu hulandes den forma di fiansa di dos aña pa kompensá e pèrdida di entrada di gobièrnu debí na e pandemia, i pa por duna sosten finansiero na e gruponan mas afektá den komunidat. Pa Kòrsou, e sosten di likides risibí tabata na balor di NAf. 244,0 mion, mientras ku Sint Maarten a risibí NAf. 117,7 mion,’ Doornbosch ta indiká.
El a sigui splika ku finansa públiko lo keda un punto di preokupashon na 2022, ya ku tantu gobièrnu
di Kòrsou komo di Sint Maarten ta antisipá défisit haltu riba nan presupuesto di servisio ordinario,
aunke mas abou ku na 2021. Komo resultado, tur dos gobièrnu lo tin mester di fiansa òf sosten di
likides pa por kubri e défisitnan proyektá. ‘Ta bini aserka ku e sosten di likides ku e gobièrnunan a
risibí durante e pandemia mester wòrdu paga bèk na 2022. Mirando e situashon aktual di finansa
públiko, e gobièrnunan lo tin ku negoshá refinansiamentu di e fiansanan akí ku Hulanda,’ segun
Doornbosch.
E teksto kompleto di e Informe di Presidente i e di dos Boletin Trimestral di Banko pa 2021 ta
disponibel riba website di Banko Sentral na http://www.centralbank.cw bou di e sekshon Publications.
Willemstad, 29 di desèmber 2021
CENTRALE BANK VAN CURAÇAO EN SINT MAARTEN

 

PB2021-037 QB2021-II Public debt continues to rise EN

PB2021-037 QB2021-II Public debt continues to rise NL

PB2021-037 QB2021-II Public debt continues to rise PA

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: