KOMUNIKADO

Kòrsou ta bai krese.

Partido MAN ta aploudí ku Gobièrnu ta sigui ku proyektonan ku a keda inisiá.

No opstante ku nos ta pasando den momentu di krísis ku un eksploshon di kontagionan dor di e variante nobo Omikron, Partido MAN a tuma nota riba retnan soshal i tambe medio di komunikashon di e plannan positivo di Ministerio di Desaroyo Ekonómiko (MEO) i kier ekstendé palabranan di felisitashon den direkshon di Minister Cijntje pa e echo ku e la informá di su tòp tres (3) metanan ku el a pone su dilanti pa logra den luna di yanüari aña 2022.

Esakinan ku ta enserá lo siguiente:

1. Konstrukshon / realisashon di fase tres di e Proyekto Rekreashon Mari Pampoen,
2. Proyekto Zakito,
3. Proyekto Marshe.

Pa logra algu, bo mester pone metanan konkreto i spesífiko bo dilanti. Pa e parti ei partido MAN ku suma plaser a tuma nota di esakinan. Tambe partido MAN ta kontentu di tuma nota ku Minister Cijntje ta sigui duna kontenido na e tres proyektonan konkreto ku èks ministernan Mc William i Martina a bai laga atras pa nan haña kontinuashon. Gobernashon ta kontinuashon i esaki sigur ta importante si nos ke logra desaroyo sosial ekonómiko duradero pa Kòrsou.

E ministernan di MAN ku aktualmente ta parlamentario, ta dispuesto pa asesorá Minister Cijntje ku konseho. loke por duna un aporte den e proseso pa kontinuashon di desaroyo di e tres proyektonan menshoná.

Partido MAN tei pa kontrolá gobièrnu, duna aporte i kritiká di un forma skèrpi, pero sèmper di un forma konstruktivo. Ora mester remarká fuerte nos lo hasi esei, pero ora di aploudí, apoyá i si ta nesesario asesorá tambe partido MAN ta pará promé den rei pa hasi esei.

Partido MAN ta deseá Minister Cijntje sabiduria i éksito, pa konkretisá e 3 proyektonan ku e la pone komo meta pa luna di yanüari 2022.

Kòrsou t’ei krese.

PartidoMAN