Medidanan den kuadro di minimalisashon di infekshon ta konta riba laman tambe.

KOMUNIKADO DI PRENSA 008 /2022
8 yanüari 2022
Medidanan den kuadro di minimalisashon di infekshon ta konta riba laman tambe.
Departamentu di Komunikashon i Prevenshon

KUERPO POLISIAL KÒRSOU SIRBI I PROTEHÁ
Medidanan tumá dor di gobièrnu ku e fin pa redusí e kantidat di infekshonnan di e
variantenan di e vírus di Corona, ta konta pa usuarionan di laman igual pa siudadanonan
riba tera.
Meskos ku outoridatnan ta ehersé diariamente kontrolnan riba kaya, den establesimentu i
demas lokalidatnan i sítionan rònt Kòrsou, asina ei personal di Wardakosta lo kontrolá
embarkashonnan i otro medionan di transporte marítmo riba kumplimentu ku reglanan di
Covid-19.
Esaki ta enserá ku propietarionan di botonan di plaser, seadoo, botonan di piska, botonan
di ‘charter’ i tur otro tipo di nabegashon, mester tene nan mes na e medidanan dekretá pa
gobièrnu di Kòrsou, ya ku e medidanan aki ta bálido pa nan tambe.
No ta permití konsentrashon di botonan ku personanan riba dje, na pirnan ni tampoko riba
flòtnan.
Botonan por tin únikamente 50 porshento (50%) di nan kapasidat máksimo na bordo,
inkluso e tripulashon.
Pa loke ta trata muzik riba boto, esaki mester ta muzik di fondo, di manera ku esnan a
bordo mester por skucha otro sin ku durante di e komunikashon mester hisa bos òf grita.
No ta permití bailamentu tampoko riba embarkashonnan.
Ta spera ku un i tur lo kuida su mes i kuida otro, asumiendo su responsabilidat i teniendo su
mes na e medidanan aki.