PROMÉ MINISTER GILMAR PISAS A TENE E PROMÉ KONTAKTO KU SEKRETARIO DI ESTADO ENKARGÁ KU  RELASHONNAN DEN REINO I DIGITALISASHON 

 

PROMÉ MINISTER GILMAR PISAS A TENE E PROMÉ KONTAKTO KU SEKRETARIO DI ESTADO ENKARGÁ KU 

RELASHONNAN DEN REINO I DIGITALISASHON 

 

Willemstad – Promé Minister sr. Gilmar Pisas a tene e promé kontakto ku sra. Alexandra van Huffelen, Sekretario di Estado enkargá ku Relashonnan den Reino i Digitalisashon dia 10 di yanüari 2022.

 

Durante di e kontakto aki Promé Minister a deseá sra. Van Huffelen hopi éksito ku su kartera nobo i a ekspresá e deseo di tin bon relashon di trabou kun’é. 

Sra. Van Huffelen a ekspresá ku pa e ta un plaser di por ta enkargá ku e kartera ariba menshoná i tambe a duna di konosé ku e lo kier hasi un biahe mas pronto ku a posibel pa bini den nos direkshon.

 

Ámbos mandatario a kompartí nan punto di bista riba e situashon aktual di e pandemia di COVID-19. 

Promé Minister a splika ku apesar di e situashon aktual tòg e ta satisfecho ku e turísmo na Kòrsou a krese den e último lunanan, maske ku ainda nos ta ketu bai den e pandemia. 

 

Otro tema ku a keda atendé ta e trayekto di “booster shot” i e sosten ku nos ta risibí pa ku esaki di parti Hulanda i tambe e sosten den forma di personal pa asistí Curaçao Medical Center (CMC). 

 

Promé Minister i e Sekretario di Estado a logra pa interkambiá tambe ku otro riba nan trayektoria profeshonal pa asina sera un poko mas di konosí ku otro.

E kontakto pa trata temanan pendiente lo keda hasi den e próksimo simannan pa asina kuminsá bai mas den detaye di proyektonan ku tin pendiente pa atendé entre Kòrsou i Hulanda.

 

E kombersashon a kana den un hopi bon esfera.