Minister Dangui Oduber PILOT PROGRAM DI BARI PA RECICLAHE ENTRE MINISTER DI TURISMO CONHUNTAMENTE CU ATA TA UN HECHO
Minister Dangui Oduber
PILOT PROGRAM DI BARI PA RECICLAHE ENTRE MINISTER DI TURISMO CONHUNTAMENTE CU ATA TA UN HECHO
ORANJESTAD – Den cuadro di un turismo sostenibel y conforme e reglanan di “Sustainable Development Goals” (SDG’s). Pa e motibo aki Minister di Turismo Sr.Dangui Oduber a percura pa e proyecto di bari pa reciclahe na nos beachnan ta un realidad, esaki ta bay contribui na eleva e producto Aruba. Semper Ministerio di Turismo hunto cu Tourism Product Enhancement Funds (TPEF) a percura pa tin bari na nos beachnan.
TPEF tabata esun cu inicialmente a explora e proyecto aki y tambe tabata considera otro alternativanan den e maneho di desperdicio cu lo contribui na un turismo sostenibel. Lamentabelmente den aña 2020 TPEF no por a sigui cubri e proyectonan aki pa motibo di falta di fondo. Na e momento ey tabata tin 100 bari rond di nos beachnan. Aki ta unda Aruba Tourism Authority (ATA) a cay aden y duna un man pa salvaguardia henter e situacion.
Den e cuadro di e desaroyo di nos producto turistico awor Aruba tin 22 bari di sushi cu ta diseña pa facilita e proceso di reciclahe. Esaki ta danki na 2021 cu a sondia diferente opcion pa asina wak con por pone e bari sushi nan bek, teniendo na cuenta cu tur e rekisito nan existente, pero tambe cu rekisito nan nobo, manera recycla aluminium, staal y plastic. Tambe botter nan di compania nan local, lo wordo recycla.
E bari sushi aki ta nobo y lo ta den color nan di Aruba su bandera. E bari sushi nan aki lo wordo patronisa door di diferente compania rond Aruba, unabes e compania adopta un di e barinan aki, nan logo lo aparece riba e bari.
Ta hopi importante pa tira bo sushi den un bari ora bo ta na un di nos beachnan y no banda di e bari pa evita cu esaki por drenta den e lama cu tur e consecuencia cu esaki por tin pa e bida maritimo. Turismo ta e driver di nos economia ta pesey nos mester inverti den dje y na mes momento cuide.
